კორონავირუსით გარდაცვლილი 20 წლის ვახტანგ ჩარკვიანის საქმეზე პროკურატურამ რესპუბლიკური საავადმყოფოს კიდევ ერთ ექიმს ბრალი წარუდგინა, – ამის შესახებ საქართველოს პირველ არხს გარდაცვლილის მამამ, გაიოზ ჩარკვიანმა განუცხადა.
მისი ინფორმაციით, ექიმ ქ.ლ.-ს ბრალი პროკურატურამ დღეს სისხლის სამართლის კოდექსის 220-ე პრიმა მუხლის მეორე ნაწილით წარუდგინა, რაც სამსახურებრივ გულგრილობას გულისხმობს და 2-დან 5 წლამდე პატიმრობას ითვალისწინებს. გაიოზ ჩარკვიანის ცნობით, პროკურატურა სასამართლოს აღკვეთის ღონისძიების შეფარდების მოთხოვნით სავარაუდოდ ხვალ მიმართავს.
ცნობისთვის, ექიმი ქ.ლ. ვახტანგ ჩარკვიანის გარდაცვალების საქმეში მესამე ბრალდებულია. რესპუბლიკური საავადმყოფოს უფროსი ექთანი თეა ბეგიაშვილი წელიწადნახევრიანი სასჯელისგან უკვე გათავისუფლდა. კიდევ ერთი პირის, ქეთევან ცერცვაძის მიმართ კი საქმის არსებითი განხილვა სასამართლოში მიმდინარეობს.
გამოძიება კვლავ გრძელდება. დაზარალებული ოჯახი რესპუბლიკური საავადმყოფოს სხვა თანამშრომლების დასჯასაც ითხოვს.
ვახტანგ ჩარკვიანი კორონავირუსზე რესპუბლიკურ საავადმყოფოში მკურნალობდა. ის კლინიკაში შეყვანიდან, მკურნალობის დაწყებიდან ერთი თვის შემდეგ 2021 წლის 10 სექტემბერს გარდაიცვალა.