ოთხშაბათს, 26 თებერვალს, ესპანეთის პოლიციის მიერ გავრცელებული ინფორმაციის თანახმად, სამართალდამცავებმა დააკავეს ოთხი ქალი, რომლებიც ეჭვმიტანილნი არიან მადრიდში არსებული არალეგალური კლინიკის მართვაში, სადაც უკანონოდ ტარდებოდა კოსმეტიკური ოპერაციები და სხვა პროცედურები.
გამომძიებლებმა დაადასტურეს, რომ ქირურგიული პროცედურები, მათ შორის ლიპოსაქცია, მკერდის გადიდება და საშვილოსნოს მილების გადაკეტვა, არასათანადო კვალიფიკაციის მქონე სპეციალისტების მიერ ცუდ ჰიგიენურ პირობებში ტარდებოდა.
გამოძიება დაიწყო საჩივრის საფუძველზე, რომლის თანახმად, მადრიდში, კარაბანჩელის რაიონში მდებარე კლინიკში ქირურგიულ ოპერაციებს უკანონოდ აკეთებდნენ.
ინსპექტორებმა რამდენჯერმე მოინახულეს კლინიკა და აღმოაჩინეს არაერთი დოკუმენტი, რომელიც შეეხებოდა ქირურგიულ ოპერაციებს, სამედიცინო მასალების ინვოისებს, ოპერაციების ანგარიშებს და ანესთეზიაზე პაციენტების თანხმობას.
ამის შემდეგ აგენტებმა მოითხოვეს სავალდებულო შესვლის უფლება და მიიღეს ჩხრეკის ორდერი, რამაც მათ საშუალება მისცა, აღმოეჩინათ საიდუმლო საოპერაციო ოთახი, სადაც მოხვედრა ერთ-ერთი ეჭვმიტანილის სახლთან მიერთებული უკანა ოთახიდან შეიძლებოდა.
საოპერაციო ოთახსა და მის მიმდებარე სახლში, ასევე საკვების შესანახ საყინულეში, სამართალდამცავებმა აღმოაჩინეს დიდი რაოდენობით მედიკამენტები, რომელთაგან ბევრს ვადა ჰქონდა გასული, ასევე სამედიცინო აღჭურვილობა.
პოლიციის განცხადებით, აგენტებმა ამოიღეს ჩატარებული სამედიცინო პროცედურების ამსახველი ფოტოები, 3 350 ევრო ნაღდი ფული და სხვადასხვა დოკუმენტი, მათ შორის, ბლოკნოტი, რომელიც, სავარაუდოდ, შეიცავდა ინფორმაციას ექთნების განრიგისა და ვიზიტების თარიღების შესახებ.
ლიპოსაქციის ჩატარების შემდეგ, ორ პაციენტ ქალს სხვა საავადმყოფოში გადაყვანა დასჭირდა, მათგან ერთ-ერთი ამ საავადმყოფოში რამდენიმე დღის განმავლობაში დარჩა.
პოლიციის ინფორმაციით, კლინიკა თავის კლიენტებს, რომლებსაც გართულებები შეექმნათ, სთავაზობდა თანხის დაბრუნებას იმის სანაცვლოდ, რომ კლინიკის არსებობის შესახებ შესაბამისი ორგანოებისთვის არ ეცნობებინათ.
სამართალდამცავებმა ოთხი ქალი უკანონო საქმიანობის, თაღლითობის, აგრეთვე პაციენტების ჯანმრთელობის წინააღმდეგ მიმართული სავარაუდო დანაშაულების ჩადენის ბრალდებით დააკავეს.
გამოძიება გრძელდება. აგენტები აგრძელებენ ამოღებული დოკუმენტაციის ანალიზს, სხვა შესაძლო მსხვერპლთა მოსაძიებლად.