ხალხმა, ოპოზიციაშია თუ უმრავლესობის მხარდამჭერია, უნდა იცოდეს, რა თანხა შემოდის და რა თანხით ხდება მანიპულირება იმისათვის, რათა ვიღაცამ სადღაც, ბრიუსელში იქნება თუ მსოფლიოს ნებისმიერ სხვა წერტილში, თავისი ინტერესი გაატაროს, – განაცხადა პარლამენტის პირველმა ვიცე-სპიკერმა, გიორგი ვოლსკიმ „ფარას“ ანალოგზე საუბრისას.
ვიცე-სპიკერმა „მედიის შესახებ“ დაინიცირებულ კანონპროექტზეც ისაუბრა, რომლითაც დადგინდება მედიის ობიექტურობის, აგრეთვე, ჟურნალისტური ეთიკის სტანდარტები, შეიზღუდება მედიასაშუალებების დაფინანსება უცხოური წყაროებიდან.
„თუკი მედია ემსახურება გარკვეული ფულის, რესურსისა და ზეგავლენის სანაცვლოდ გარე ინტერესს და ეს გარე ინტერესი გულისხმობს საქართველოს სტაბილურობის შერყევას, რევოლუციის განვითარებას, ქვეყნის დამარცხება, ეკონომიკურ რეცესიას, რასაკვირველია ამასთან დაკავშირებით შესაბამისი ზომები უნდა იყოს მიღებული, მაგრამ ამ ზომების სათავეში უნდა იდგეს ევროპული სტანდარტი, რომელიც გააჩნია ბრიტანეთს“, – აღნიშნა გიორგი ვოლსკი.
ამერიკული „ფარას“ ანალოგის განხილვას საქართველოს პარლამენტი მომდევნო კვირას იწყებს. მას შემდეგ, რაც ამერიკის პრეზიდენტის ახალმა ადმინისტრაციამ აღიარა, რომ USAID-ი და NE-ი გამოიყენებოდა სხვადასხვა ქვეყანაში, მათ შორის საქართველოში ვითარების ასარევად, „ენჯეოების“ გამჭვირვალობას მმართველ გუნდში უალტერნატივოდ მიიჩნევენ. მომავალ კვირასვე დაიწყება მედიის შესახებ კანონპროექტის განხილვაც. დაწესდება მედიის ობიექტურობისა და ჟურნალისტიკური ეთიკის ბრიტანული სტანდარტები.