სალომე ზურაბიშვილს ლიდერის თვისებები არ გააჩნია, ის „ნაციონალური მოძრაობის“ რიგითი წევრია და, სამწუხაროა, რომ იქით მხარეს გადავიდა, – ამის შესახებ საპარლამენტო უმრავლესობის წევრმა, ლევან მაჭავარიანმა განაცხადა.
როგორც მაჭავარიანი აღნიშნავს, ოპოზიციას ურჩევს თვითმმართველობის არჩევნებისთვის მზადება დაიწყონ, რათა ისე არ დამარცხდნენ, როგორც საპარლამენტო არჩევნებში.
„სალომე ზურაბიშვილი „ნაციონალური მოძრაობის“ წარმომადგენელია. მას ლიდერის თვისებები და უნარ-ჩვევები არ გააჩნია, ის „ნაციონალური მოძრაობის“ რიგითი წევრია და სამწუხაროა, რომ ეს ქალბატონი იქით მხარეს გადავიდა. ბოლო წლების განმავლობაში ვატყობთ, რომ ის „ნაციონალური მოძრაობის“ ერთ-ერთი ყველაზე აქტიური აქტივისტია. როცა ჩვენ გამჭვირვალობის ქართული კანონი დავაინიცირეთ, ზურაბიშვილმა ბრიფინგი ჩაატარა და თქვა, რომ „ქართულმა ოცნებამ” ევროპულ კურსს გადაუხვია. ეს მაშინ, როდესაც საქართველომ რუსეთს სანქციები არ დაუწესა. დღეს, ის ამ ყველაფერს უარყოფს და ამბობს, რომ არაფერი უთქვამს. რა შანსები უნდა ჰქონდეს ოპოზიციის ერთობლივ შეხვედრებს? თვეები გადის, თვითმმართველობის არჩევნები ახლოვდება და მათ ვურჩევ, თვითმმართველობის არჩევნებისთვის მზადება დაიწყონ, რათა იგივე გამანადგურებელი ანგარიშით არ წააგონ, როგორც საპარლამენტო არჩევნები წააგეს. თუ უნდათ, ეს სახლობანა ითამაშონ. სალომე ზურაბიშვილს სადღაც, „სოროსის ფონდის“ გვერდით ოფისი აქვს ნაქირავები და სახლობანას თამაში იქ გრძელდება, თითქოს, პრეზიდენტის რეზიდენციაში მიდიან. რაც უფრო მალე დაბრუნდებიან რეალობაში, მით უკეთესი იქნება“, – აღნიშნა მაჭავარიანმა.