პროკურორ ანი ხახანაშვილის განცხადებით, “თანაინვესტირების ფონდის” ყოფილი გენერალური დირექტორს, გიორგი ბაჩიაშვილს მიერ საზღვრის უკანონო კვეთის შესახებ საუბრობს. მისი თქმით, თუ როგორ და ვისი დახმარებით დატოვა ბრალდებულმა ქვეყნის საზღვარი, აღნიშნულთან დაკავშირებით საგამოძიებო მოქმედებები აქტიურ რეჟიმში მიმდინარეობს.
“პასპორტების ჩაბარების მიუხედავად, 2025 წლის 2 მარტს, გიორგი ბაჩიაშვილმა საქართველოს სასაზღვრო გამშვები პუნქტის გვერდის ავლით, უკანონოდ გადაკვეთა საქართველოს სახელმწიფო საზღვარი სომხეთის მიმართულებით და ამის შემდეგ რუსეთის ფედერაციის მოქალაქეობის დამადასტურებელი პასპორტი წარადგინა. დადასტურებულია, საქართველოს ოფიციალური ორგანოებიდან მიღებული ინფორმაციით, მათ შორის, ანალიტიკური დეპარტამენტიდან მიღებული ინფორმაციით, გიორგი ბაჩიაშვილს ოფიციალურად არ დაუტოვებია საქართველოს საზღვარი, თუმცა სომხეთის ოფიციალური ორგანოებიდან მიღებული ინფორმაციით, ბაჩიაშვილს გადაკვეთილი აქვს სომხეთის საზღვარი რუსეთის პასპორტის გამოყენებით.
რა ხერხის გამოყენებით გადაკვეთა მალულად საქართველოს სახელმწიფო საზღვარი უკანონოდ, ამაზე ბუნებრივია, მიმდინარეობს ინტენსიურ რეჟიმში საგამოძიებო მოქმედებები და დამატებით გეცოდინებათ,” – აღნიშნა ანა ხახანაშვილმა.
საქმესთან დაკავშირებით სასამართლო სხდომის დაწყებამდე ასევე ისაუბრა გიორგი ბაჩიაშვილის ადვოკატმა.
“დღევანდელი აღკვეთის ღონისძიების შეფარდების ერთადერთი მიზანი ბრალდების მხარისთვის არის ძებნის გამოცხადება გიორგი ბაჩიაშვილის მიმართ. შესაბამისად, დაცვის ხაზის ძირითადი ინტერესი გახლავთ, რომ არ მოხდეს ინტერპოლის მიერ ძებნის გამოცხადება, რისთვისაც ჩვენ, ჩვენი სტრატეგიის გათვალისწინებით ყველანაირ მტკიცებულებას ვაგროვებთ და წარვადგენთ.
ერთადერთი მოწმე არის გამოკითხული მოწმის სახით, პოლიციის თანამშრომელი, რომელმაც განაცხადა, რომ ოპერატიულად მან დაადგინა, რომ ბაჩიაშვილმა ამ ფორმით გადალახა საზღვარი. არანაირი სხვა მოწმე ამ საქმეში არ არსებობს,” – აღნიშნა გიორგი ბაჩიაშვილის ადვოკატმა, ლევან მახარაშვილმა.
ცნობისთვის, მესამე ბრალდებაზე გიორგი ბაჩიაშვილს პატიმრობა დაუსწრებლად შეეფარდა. “თანაინვესტირების ფონდის” ყოფილ ხელმძღვანელს საზღვრის უკანონო კვეთაზე ბრალი დღეს წარუდგინეს და სასამართლომ აღკვეთის ღონისძიებაზე დღესვე იმსჯელა.
სასამართლო სხდომის დაწყებამდე შინაგან საქმეთა სამინისტრომ განცხადება გამოაქვეყნა. უწყების ცნობით, გიორგი ბაჩიაშვილი თავდაპირველად ავტომობილში მოწყობილი სპეციალური სამალავის საშუალებით სომხეთში გადავიდა, იქიდან კი, რუსეთის მოქალაქეობის დამადასტურებელი სხვა პასპორტი წარადგინა, რის შედეგადაც გაიარა საზღვარი.
გიორგი ბაჩიაშვილს ქვეყნის დატოვება აკრძალული ჰქონდა. მან გუშინ თავად დაწერა, რომ საქართველო დატოვა. მიზეზად საფრთხეებზე მიღებული ინფორმაცია დაასახელა. პოსტი სოციალურ ქსელში სასამართლო სხდომის დაწყებამდე გამოაქვეყნა. თანაინვესტირების ფონდის ხელმძღვანელს საზღვრის უკანონო კვეთამდე ორი ბრალი ჰქონდა წარდგენილი.