სირიელი ლტოლვილის, ჰალედ ალნომანის თქმით, მას შემდეგ, რაც 10 წლის წინ ავსტრიაში გამოიქცა, ინტეგრირებისთვის დიდი ძალისხმევა გასწია: გერმანულ ენაზე საუბარი უკვე თავისუფლად შეუძლია, კალატოზად დაიწყო მუშაობა და მოქალაქეობა მოითხოვა. მისი ოთხი შვილიდან უმცროსი ავსტრიაში დაიბადა, დანარჩენებიც უფრო ავსტრიელებად გრძნობენ თავს, ვიდრე სირიელებად, რადგან ალპურ ქვეყანაში გაიზარდნენ. მაგრამ იანვარში, როდესაც ასადის რეჟიმის დამხობას ზეიმობდა, მისი ცხოვრება თავდაყირა დადგა, რადგან ავსტრიის ხელისუფლებისგან მიიღო ოფიციალური შეტყობინება, რომ მის ოჯახს ლტოლვილის სტატუსი გაუუქმდებოდა. „ეს გულში დანის ჩარტყმასავით იყო“, – განაცხადა სააგენტო „ფრანს პრესთან“ საუბრისას 42 წლის მამაკაცმა, რომელიც ემოციებს ძლივს იკავებდა.
ავსტრიაში ისედაც გაზრდილი ანტიმიგრანტული განწყობები მას შემდეგ კიდევ უფრო გამძაფრდა, რაც გასულ თვეში, ქალაქ ვილახში, 14 წლის ბიჭის დანით მკვლელობისთვის, სირიელი დააკავეს. ამ შემთხვევას, სავარაუდოდ, ისლამისტური მოტივი ედო საფუძვლად. მიუხედავად იმისა, რომ სხვა სირიელი ლტოლვილი გმირად გამოაცხადეს იმისთვის, რომ ტერორისტ თავდამსხმელს, შეჩერების მიზნით, მანქანა დააჯახა, ალნომანი აცხადებს, რომ ავსტრიაში მცხოვრები სირიელებისთვის ეს ამბავი „ნამდვილი კატასტროფა“ იყო. „ჩვენთვის ძალიან ცუდი რამ მოხდა. ამ იდიოტის გამო, ახლა ყველამ უნდა გადავიხადოთ საფასური“.
მასობრივი „შემთხვევითი შემოწმება“
დეკემბერში რამდენიმე ევროპულმა ქვეყანამ თავშესაფრის მიღების თაობაზე სირიელების განაცხადების განხილვა მას შემდეგ შეაჩერა, რაც თითქმის 14-წლიანი სისხლიანი სამოქალაქო ომის შემდეგ, დაემხო ასადის დინასტია, რომელმაც 12 მილიონი ადამიანი ლტოლვილად აქცია. თუმცა, ავსტრია, სადაც თითქმის 100 000 სირიელი ცხოვრობს, კიდევ უფრო შორს წავიდა. მან ლტოლვლთა ოჯახების წევრების შეერთების პროცესი შეაჩერა და 2 900-მდე სირიელისთვის ლტოლვილის სტატუსის გაუქმების პროცედურები დაიწყო. ავსტრიის შინაგან საქმეთა სამინისტროს განცხადებით, მომზადების პროცესშია „სირიაში მოწესრიგებული რეპატრიაციისა და დეპორტაციის პროგრამა“, თუმცა, უწყება იმასაც აღიარებს, რომ ამჟამად ამის გაკეთება შეუძლებელი და უკანონოა. თავის მხრივ, კონსერვატორმა შინაგან საქმეთა მინისტრმა, გერჰარდ კარნერმა აღნიშნა, რომ ვილახში მომხდარი თავდასხმის შემდეგ, ავღანელი და სირიელი თავშესაფრის მაძიებლების სახლებში „შემთხვევითი შემოწმებების“ მასობრივად ჩატარების ლეგალიზებას გეგმავს.
მან დაიფიცა, რომ მიგრაციის შესაზღუდად „დღე და ღამე“ იმუშავებს. ახალი სამთავრობო კოალიცია ზეწოლის ქვეშაა ოპოზიციური ულტრამემარჯვენე „თავისუფლების პარტიის“ მხრიდან, რომელმაც სექტემბერში ჩატარებულ არჩევნებში ყველაზე მეტი ხმა მიიღო. ამ პარტიამ პირობა დადო, რომ ოჯახის წევრების შეერთების პროცესს ყველა ეროვნების ლტოლვილისთვის შეაჩერებს.
„ღამით ვერ ვიძინებთ“
ექსპერტები ამბობენ, რომ ლტოლვილის სტატუსის გაუქმების შესახებ შეტყობინებების მიღება არ ნიშნავს იმას, რომ ავსტრიაში დარჩენის უფლებას სირიელებს უახლოეს მომავალში წაართმევენ. თუმცა, იმავე ექსპერტების თქმით, ამ შეტყობინებებმა მიგრანტთა წრე მაინც ძალიან შეაშფოთა. „ღამით ვერ ვიძინებთ. ახლა ყველა სირიელს ეშინია. ამ გზავნილის მიღების შემდეგ, მუდმივი წნეხის ქვეშ ვარ. ჩვენ აქ არ ვუნდივართ. რა დავაშავეთ?“, – განაცხადა ალნომანმა.
ოჯახის წევრების შეერთების შეჩერებამ ბევრს უკვე მძიმედ დაარტყა. 37 წლის საკვების მიმტანმა, აჰმედ ელგრიკმა, რომელიც ამჟამად ვენაში ცხოვრობს, თავისი მეუღლე და 5 შვილი ბოლოს ოთხი წლის წინ ნახა, როდესაც სირიიდან გამოქცევას აპირებდა. მას შემდეგ, რაც შარშან საჭირო დოკუმენტები შეაგროვა, აჰმედს დიდი იმედი ჰქონდა, რომ თავის ოჯახს ავსტრიაში ჩამოიყვანდა. მას უკვე შეძენილი ჰქონდა საწოლები თავისი შვილებისთვის, რომლებიც 4-დან 14 წლამდე ასაკისანი არიან, როდესაც ლტოლვილის სტატუსის გაუქმების შესახებ შეტყობინება მიიღო. მოგვიანებით ისიც აცნობეს, რომ მისი ოჯახის წევრებს ვიზებს არ მისცემდნენ.
„მე ვიცინოდი, ოღონდ არა სიხარულისგან, არამედ ტკივილისგან. ამ ტკივილს მთელ ჩემი ოჯახი გრძნობს. ოთხი წლის განმავლობაში ვეუბნებოდი ოჯახის წევრებს, ცოტა კიდევ მოითმინეთ, თითქმის მივაღწიეთ მიზანს, მე ყველაფერი მოვამზადე-მეთქი“, – განუცხადა „ფრანს პრესს“ იდლიბიდან ჩამოსულმა ელგრიკმა, რომლის თქმითაც, სირიაში დაბრუნების შემთხვევაში, ქვეყნის ახალი ისლამისტური ხელმძღვანელობის მხრიდან მის წინააღმდეგ დევნის დაწყებებისა ეშინია. ამასობაში კი, ავსტრიაში მცხოვრებ სირიელებს, სამშობლოში ნებაყოფლობით დაბრუნებისთვის, 1 000 ევროს ($1 050) სთავაზობენ. ავსტრიის მთავრობის უახლესი მონაცემების თანახმად, ეს შეთავაზება, ამ დრომდე, თითქმის 100-მა სირიელმა მიიღო.