ისრაელის არმიის პრეს-მდივანი, კონტრ-ადმირალი დანიელ ჰაგარი, რომელიც ღაზაში „ჰამასის“ წინააღმდეგ წარმოებული ომის სახედ იქცა, თანამდებობას ტოვებს. ისრაელის არმიამ ეს განცხადება მისი წასვლის მიზეზების ახსნის გარეშე გაავრცელა.
„არმიის გენერალური შტაბის უფროსი, გენერალ-ლეიტენანტი ეიალ ზამირი და არმიის პრეს-სპიკერი დანიელ ჰაგარი შეთანხმდნენ, რომ მომდევნო კვირების განმავლობაში კონტრ-ადმირალ ჰაგარის მოვალეობები შეუწყდება“, – ნათქვამია ისრაელის არმიის განცხადებაში.
გენერალურმა შტაბის უფროსმა „დიდი მადლიერება გამოხატა დანიელ ჰაგარის მიმართ სამხედრო სამსახურში ისრაელის სახელმწიფოს სასარგებლოდ გატარებული წლებისთვის“, – აღნიშნულია განცხადებაში, რომელშიც ასევე ხაზგასმულია, რომ კონტრ-ადმირალმა „პროფესიონალურად და თავდადებულად შეასრულა არმიის პრეს-სპიკერის როლი ისრაელის ისტორიის ერთ-ერთ ყველაზე რთულ მომენტში“.
2023 წლის 7 ოქტომბერს „ჰამასის“ მიერ ისრაელის ტერიტორიაზე განხორციელებული თავდასხმის შემდეგ, ისლამისტური მოძრაობის წინააღმდეგ ჩატარებული სამხედრო ოპერაციების შესახებ ხშირი სატელევიზიო ბრიფინგების წყალობით, დანიელ ჰაგარი ისრაელელებისთვის ნაცნობ და პატივსაცემ სახედ იქცა.
საზღვაო ძალების 49 წლის ყოფილი მედესანტე მსახურობდა და ხელმძღვანელობდა ელიტურ ჯგუფ „შაიეტეტ 13“-ს – ერთ-ერთ ყველაზე საიდუმლო სამხედრო ქვედანაყოფს, რომელიც თავისი სარისკო კონტრტერორისტული და დივერსიული ოპერაციებით არის ცნობილი.
ისრაელის მედიის ცნობით, თანამდებობიდან გადადგომა მან იმიტომ გადაწყვიტა, რომ მარტში, პრეს-სპიკერად მუშაობის ვადის ამოწურვის შემდეგ, ვერ მიიღო ვიცე-ადმირალის წოდება, რაც დაწინაურების მანიშნებელი იქნებოდა.
გარდა ამისა, გასული წლის დეკემბერში ის იძულებული გახდა, ბოდიში მოეხადა მას შემდეგ, რაც გააკრიტიკა კანონპროექტი, რომელიც სამხედროებსა და თავდაცვის მაღალჩინოსნებს საშუალებას აძლევდა, კონფიდენციალური სამხედრო დოკუმენტების უნებართვოდ გაცემის შემთხვევაში, სისხლის სამართლის პასუხისმგებლობისგან აერიდებინათ თავი.