ორშაბათს, 11 მარტს, იაპონიის მთავრობამ, ბრინჯის სტრატეგიული მარაგების გაყიდვის მიზნით, აუქციონი ჩაატარა, რაც საკმაოდ იშვიათი შემთხვევაა. ამ გზით ტოკიო ქვეყანისთვის ძირითადი საკვებ პროდუქტზე (ბრინჯზე) ფასების სწრაფი ზრდის შეჩერებას ცდილობს.
მზარდი მოთხოვნისა და სავაჭრო არხების მნიშვნელოვანი შეფერხებების ფონზე, იაპონიაში ბრინჯის ფასებმა 2024 წლის ზაფხულიდან მკვეთრად მოიმატა. ოფიციალური მონაცემებით, მიმდინარე წლის იანვარში ბრინჯის ფასი 71 პროცენტით გაიზარდა, რაც რეკორდული მაჩვენებელია.
210 000 ტონა ბრინჯი ბაზარზე მომხმარებლების ინტერესების დასაკმაყოფილებლად
ამ ტენდენციის შესაჩერებლად, იაპონიის მთავრობამ თებერვლის შუა რიცხვებში განაცხადა, რომ ბრინჯის სტრატეგიული მარაგების გამოთავისუფლება და ბაზარზე 210 000 ტონამდე პროდუქტის გატანა გადაწყვიტა, რომლის დიდი ნაწილიც ორშაბათს გამართულ აუქციონზე გაიყიდა.
სოფლის მეურნეობის სამინისტრო ამ დღეებში აუქციონზე 150 000 ტონა ბრინჯის შემძენებს გამოაცხადებს, გაყიდული მარაგები კი მაღაზიებში მარტის ბოლოსთვის იქნება ხელმისაწვდომი.
სამინისტროს განცხადებით, საჭიროების შემთხვევაში, მომხმარებელთა ინტერესებიდან გამომდინარე, შეიძლება აუქციონზე დამატებით კიდევ 60 000 ტონა ბრინჯი გაყიდოს.
პანიკა და მოუსავლიანობა
ბრინჯზე ფასების ზრდა რამდენიმე ფაქტორით არის გამოწვეული. მათ შორის აღსანიშნავია გაზრდილი მოთხოვნა, რაც აგვისტოში შესაძლო „მეგამიწისძვრის“ შესახებ გაფრთხილებით გამოწვეულმა პანიკურმა შესყიდვებმა გამოიწვია. ასევე სახელდება 2023 წლის ცუდი მოსავალი, რაც ცხელმა ამინდმა განაპირობა.
„ეს ძალიან არანორმალური სიტუაციაა“, – აღნიშნა სოფლის მეურნეობის მინისტრმა, ტაკუ ეტომ 11 მარტს, პარლამენტში გამოსვლისას.
ხელისუფლების განცხადებით, პრობლემას კიდევ უფრო ამძიმებს ის ფაქტი, რომ ზოგიერთი მოვაჭრე, მაქსიმალური მოგების მიღების მიზნით, ბრინჯის მარაგების გასაყიდად ხელსაყრელი მომენტის დადგომას ელოდება.
იაპონიას ამჟამად საგანგებო სიტუაციებისთვის გადანახული დაახლოებით ერთი მილიონი ტონა ბრინჯის მარაგი გააჩნია.