თბილისის საქალაქო სასამართლოში სახელმწიფო საზღვრის უკანონო კვეთის საქმეზე მიხეილ სააკაშვილის პროცესი გაიმართა. სააკაშვილი პროცესზე არ გამოცხადდა.
მიზეზად ჯანმრთელობის მდგომარეობა დაასახელა, თუმცა, ცნობა ამის შესახებ დაცვის მხარეს არ წარუდგენია. მოსამართლემ მიიჩნია, რომ ბრალდებულს საბოლოო სიტყვის თქმის სურვილი არ აქვს, ის სათათბიროდ გავიდა. განაჩენი კი ორშაბათს გამოცხადდება.
„აღნიშნულ საქმეზე გამოკვლეულია არაერთი მტკიცებულება, ვიდეომასალა, ექსპერტის დასკვნები, დაიკითხნენ მოწმეები, რაც საბოლოო ჯამში ადასტურებს ბრალდებულ მიხეილ სააკაშვილის მიერ საქართველოს სახელმწიფო საზღვრის უკანონოდ გადმოკვეთის ფაქტს. ამიტომ მოლოდინი გვაქვს, რომ ორშაბათს გამოცხადდება ამ ნაწილში გამამტყუნებელი განაჩენი და სასამართლო სრულად ცნობს დამნაშავედ მიხეილ სააკაშვილს წარდგენილ ბრალდებაში, რაც გულისხმობს საზღვრის უკანონოდ გადაკვეთის ფაქტს,“ – განაცხადა პროკურორმა ლევან ვეფხვაძემ.