ერაყში „ისლამური სახელმწიფოს“ (ISIS) ერთ-ერთი ყველაზე საშიში ტერორისტი აბდალა მაკი მოსლეჰ ალ-რიფაია ლიკვიდირებული, რომელიც ცნობილია, როგორც „აბუ ხადიჯა“. ინფორმაციას CNN-ი ავრცელებს.
„აბუ ხადიჯას“ ლიკვიდაცია სპეცოპერაციის დროს მოხდა, რომელიც ეროვნული დაზვერვისა და კოალიციური ჯარების მუშაობის შედეგად ჩატარდა აშშ-ის ხელმძღვანელობით. ანბარის პროვინციაში, რომელიც ქვეყნის დასავლეთ ნაწილში მდებარეობს, საავიაციო შეტევა განხორციელდა, თუმცა ინფორმაცია ალ-რაფაის ლიკვიდაციის შესახემ მეორე დღეს გახდა ცნობილი.
ოფიციალურმა ბაღდადმა „აბუ ხადიჯას“ ერთ-ერთი ყველაზე საშიში ტერორისტი უწოდა არა მხოლოდ ერაყში, არამედ მთელს მსოფლიოში.
ალ-რაფაის ლიკვიდაციას აშშ-ის პრეზიდენტი დონალდ ტრამპიც გამოეხმაურა, რომელმაც აღნიშნა, რომ ამერიკელი სამხედროები ერაყის მთავრობასა და ქურთ ძალებთან ერთად ამ ტერორისტის ადგილსამყოფლის დადგენაზე მუშაობდნენ.
იმავე დღეს ერაყისა და სირიის წარმომადგენლებს შორის შეხვედრა შედგა, რომელზეც მხარეებმა ის საფრთხეები განიხილეს, რომლებიც „ისლამური სახელმწიფოს“ მხრიდან ჯერ კიდევ არსებობს. ერაყის საგარეო საქმეთა მინისტრმა ფუად ჰუსეინმა უფრო მჭიდრო თანამშრომლობის აუცილებლობას გაუსვა ხაზი, სირია-ერაყის საზღვარზე მეტი კონტროლის განხორციელებისთვის.