ლატვიის ეროვნული ავიაკომპანია „ეარბალტიკი“ უარყოფს რუსული დამოუკიდებელი მედიასაშუალება „ვერსტკას“ მიერ გავრცელებულ ინფორმაციას, რომლის მიხედვითაც, აღნიშნულმა ავიაკომპანიამ, სავარაუდოდ, დაარღვია ევროკავშირის დაწესებული სანქციები, რომელიც საავიაციო საწვავის შესყიდვების დროს რუსულ კომპანიებთან თანამშრომლობას შეეხება. შესაბამისი განცხადება „ეარბალტიკმა“ 14 მარტს გამოაქვეყნა.
მედიასაშუალება „ვერსტკა“ მის მიერ გავრცელებული ინფორმაციის წყაროდ ასახელებს საბაჟო დეკლარაცებს, აგრეთვე რუსეთის საგარეო ეკონომიკური საქმიანობის მონაცემთა ბაზას, რომელშიც საქონლის ექსპორტი და იმპორტია ასახული. ამ მონაცემებიდან ირკვევა, რომ 2022 წლის თებერვლიდან 2024 წლის მარტამდე პერიოდში, „ეარბალტიკმა“ რუსეთში სავარაუდოდ 28 სახის საწვავი პროდუქტის შეძენა სცადა. აქედან 13 გარიგება წარმატებით დასრულდა.
ორი შესყიდვა, სავარაუდოდ, უკრაინაში რუსული აგრესიის დაწყებიდან მალევე, 2022 წლის თებერვალსა და მარტში, „გაზპრომნეფტ-აეროსთან“ გაფორმებული კონტრაქტების საფუძველზე განხორციელდა. დანარჩენი 11 გარიგება წყაროებში 2023 წლით თარიღდება, მომწოდებლად კი „ტატნეფტავიასერვისია“ დასახელებული.
არღვევს თუ არა ეს ტრანზაქციები რუსულ კომპანიებზე დაწესებულ ევროკავშირის სანქციებს? 2022 წლის ივნისიდან ამოქმედებული შეზღუდვების თანახმად, „აკრძალულია რუსეთში წარმოებული ან რუსეთიდან ექსპორტირებული ნავთობპროდუქტების შეძენა, იმპორტი ან გადაცემა, პირდაპირ თუ არაპირდაპირი გზით“. თუმცა, სანქციები არ ვრცელდებოდა იმ კონტრაქტებზე, რომლებიც 2023 წლის 5 თებერვლამდე უნდა შესრულებულიყო.
„ვერსტკა“ დაასკვნის, რომ 2023 წლის 5 თებერვლიდან 2024 წლის მარტამდე „ეარბალტიკისთვის“ ავიასაწვავის მიწოდება, სავარაუდოდ, ევროკავშირის მიერ დაწესებული სანქციების დარღვევით ხდებოდა.
ამ ინფორმაცია „ეარბალტიკი“ უარყოფს.
ლატვიური ეროვნული ავიაკომპანია ხაზგასმით აღნიშნავს, რომ უკრაინაში რუსეთის სრულმასშტაბიანი შეჭრისა და ევროკავშირის სანქციების ძალაში შესვლის შემდეგ, საწვავის რუს მიმწოდებლებთან აღარ უთანამშრომლია, რუსულ კომპანიებისთვის თანხა არ გადაუხდია და ამ ქვეყანაში ფრენები მთლიანად შეაჩერა.
ავიაკომპანიის ცნობით, „ეარბალტიკის“ მიერ „გაზპრომნეფტ-აეროსთვის“ ბოლო გადახდები 2022 წლის მარტსა და აპრილში, სანქციების შემოღებამდე გაწეული მომსახურებისთვის განხორციელდა, ხოლო „ტატნეფტავიასერვისისთვის“ თანხის ბოლო გადარიცხვა 2021 წლის ნოემბერში, ანუ უკრაინაში რუსეთის შეჭრამდე შესრულდა.
„ეარბალტიკი“ ასევე აღნიშნავს, რომ მკაცრად იცავს ევროკავშირის სანქციებით გათვალისწინებულ შეზღუდვებს ავიასაწვავზე, რომელიც ძალაში მთლიანად 2023 წლის თებერვალში შევიდა.
შესაბამისად,„ეარბალტიკი“ უარყოფს ბრალდებას, რომ საწვავი მან სანქციების დარღვევით შეიძინა.
ლატვიის ტრანსპორტის სამინისტრომ, რომელიც ავიაკომპანიის აქციონერია, „ლატვიის რადიოს“ წერილობით ასევე განუცხადა: „უკრაინაში რუსეთის სრულმასშტაბიანი შეჭრისა და საწვავის იმპორტზე ევროკავშირის მიერ დაწესებული შესაბამისი სანქციების ძალაში შესვლის შემდეგ, „ეარბალტიკი“ საწვავის რუს მომწოდებლებთან არ თანამშრომლობს და მათთან სახელშეკრულებო ურთიერთობები არ გააჩნია“.