აჭარის მთავრობის ყოფილმა თავმჯდომარემ, “ნაციონალური მოძრაობის” წევრმა, ლევან ვარშალომიძემ ყაზახეთში იზოლატორი დატოვა.
ამის შესახებ ინფორმაციას „ნაციონალურ მოძრაობაში“ ადასტურებენ.
“ლევან ვარშალომიძე იზოლატორიდან თავისუფალია, თუმცა ის უსაფრთხოდ უნდა დაბრუნდეს.
მადლობა ჩვენს ყაზახ მეგობრებს, ვინც დაინტერესდა, ყველაფერს აკეთებს და საუბრობს ამის შესახებ”,- წერს ხატია დეკანოიძე.
ინფორმაციისთვის, ყაზახეთში ლევან ვარშალომიძის დაკავების თაობაზე ინფორმაცია გუშინ გავრცელდა. „ნაციონალური მოძრაობის“ ცნობით, ის მაშინ დააკავეს, როდესაც აეროპორტით საზღვარს კვეთდა. როგორც პარტიაში აცხადებდნენ, წინასწარი ინფორმაციით, საქმე ეხება რუსეთის ფედერაციიდან გაგზავნილ ინფორმაციას სისხლის სამართლის საქმესთან დაკავშირებით, რომელიც უკრაინის ხელისუფლებასთან ლევან ვარშალომიძის პოლიტიკურ საკონსულტაციო საქმიანობას უკავშირდება.