მაშინ პატარა ბიჭი არ იყავით, 32 წლის კაცს ეჭვი მაინც არ შეგეპარათ, რომ ციხეში მყოფ ადამიანთან გაგზავნიან, გიხდიან ამაში 2000 დოლარს, შეიძლება 1000-ს, მით უარესი და თქვენ მიდიხართ გაჭირვებაში მყოფ ადამიანთან. პატიმარი, რომელსაც ბორკილები ადევს და თავისუფლება აქვს აღკვეთილი, სულ რომ ფუფუნებაში ამყოფო, ქართულ ენაზე მას გაჭირვებული ადამიანი ჰქვია, – ასე მიმართა პარლამენტის დროებითი საგამოძიებო კომისიის თავმჯდომარემ თეა წულუკიანმა ადვოკატ დავით კვაჭანტირაძეს, რომელიც კომისიის კითხვებს ბიზნესმენ ბესო ხარძიანის საქმესთან დაკავშირებით პასუხობს.
წულუკიანის განცხადებით, სისხლის სამართლის საქმის ადვოკატი იმას ვერ იტყვის, რომ „ნაციონალური მოძრაობის“ დროს ციხეში რა ხდებოდა არ იცოდა, შესაბამისად, ის დაინტერესდა, ეჭვი მაინც არ შეეპარა კვაჭანტირაძეს, როდესაც ასეთ პირობებში მყოფ პატიმართან რამდენიმე მილიონიანი წილის გადაცემაზე საუბრობდა?!
„იმას ვერ იტყვით სისხლის სამართლის ადვოკატი, რომ თქვენ არ იცოდით „ნაციონალური მოძრაობის“ დროს ციხეში რა ხდებოდა, ამას ვერ იტყვით და იმედი მაქვს, არ იტყვით. მიდიხართ ასეთ პირობებში სისხლის სამართლის ადვოკატი ციხეში, ხვდებით პატიმარს და ესაუბრებით ისეთი წილის გადაცემაზე, რომელიც რამდენიმე მილიონი ლარი ღირს. ეჭვი მაინც არ შეგეპარათ, რომ რაღაც სიბინძურესთან გქონდათ საქმე?!“, – მიმართა თეა წულუკიანმა დავით კვაჭანტირაძეს, რომელმაც თავის მხრივ განაცხადა, რომ „იმ ხარისხით“ რომ შეპარვოდა ეჭვი, აუცილებლად უარს იტყოდა“.
„ყოველ შემთხვევაში, მე ჩავთვალე, რომ ბატონ ბესოს იმ მომენტში სურდა მინდობილობის გაცემა და ეს მისი ნამდვილი ნება იყო, არ უთქვამს რაიმე ისეთი“, – აღნიშნა ადვოკატმა.
თეა წულუკიანის დამაზუსტებელ კითხვაზე, დღეს, უკვე 50 წელს მიღწეული კაცი თუ აცნობიერებს, რომ ძალიან ბინძურად, ბინძურ საქმეში გამოიყენეს და გააუბედურებინეს ძალიან ბევრი ადამიანი, კვაჭანტირაძემ უპასუხა: „მე უშუალოდ ბატონი ბესოსთვის, ვფიქრობ, არაფერი დამიშავებია, მაგრამ, რა თქმა უნდა, განვიცდი იმ მძიმე სიტუაციას, რაც მოხდა შემდეგ, საერთოდ მკვლელობით დასრულდა. ალექსანდრე ფირცხალაიშვილმა და ჩემმა კოლეგებმა იციან ჩემი რეპუტაციის შესახებ, ამიტომ მე ამ რეპუტაციას რისკზე არ შევაგდებდი, მე რომ თავიდან სწორად გამეანალიზებინა ეს სიტუაცია. უბრალოდ, ის ფაქტები, რასთან დაკავშირებითაც მე მქონდა შეხება, ასეთი დასკვნის გაკეთების საშუალებას არ მაძლევდა“.
2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე დღეს ბიზნესმენ ბესო ხარძიანის საქმე განიხილება. კომისიის წევრებმა უკვე მოუსმინეს ბიზნესმენის შვილს, ბესო ხარძიანს და გიორგი უდესიანის დის ქმარს, პატიმარ ზაზა გუგავას.