რუმინეთი განმეორებითი საპრეზიდენტო არჩევნებისთვის ემზადება. ბოლო გამოკითხვის თანახმად, პირველ ტურში ულტრამემარჯვენე პოლიტიკოსი, ჯორჯე სიმიონი გაიმარჯვებს, თუმცა, მეორე ტურში მას მცირე სხვაობით ბუქარესტის ამჟამინდელი პროევროპელი მერი, ნიკუშორ დანი დაამარცხებს. რუმინეთის საკონსტიტუციო სასამართლომ, გასული წლის ნოემბერში, პირველი ტურის გამარჯვებულს, პრორუს პოპულისტ კალინ ჯორჯესკუს არჩევნებში მონაწილეობა აუკრძალა. სასამართლოს გადაწყვეტილების თანახმად, საპრეზიდენტო არჩევნებში მის სასარგებლოდ მოსკოვი ჩაერია.
ჯორჯესკუ, მაისში დანიშნული განმეორებითი არჩევნებიდან საბოლოოდ მოხსნამდე ერთი დღით ადრე, რუმინეთის ულტრამემარჯვენე ძალების სხვა წარმომადგენლებთან ერთად გამოჩნდა ვიდეოში. მანამდე ის არჩევნების ფავორიტად იყო მიჩნეული. „ამ ქვეყნის მომავლის დიდი რწმენით, ჩვენ წინ მივიწევთ“, – განაცხადა უკვე მოხსნილმა კანდიდატმა 10 მარტს.
პარლამენტში გავლენით მეორე პარტიის ლიდერმა, ჯორჯე სიმიონმა და მანამდე ბევრისთვის უცნობმა, ანამარია გავრილოვამ, რომელიც ახალგაზრდებზეა ორიენტირებული, შეთანხმებას მიაღწიეს. თუ საარჩევნო კომისია არჩევნებში ორივეს დაუშვებს, ერთ-ერთი მათგანი მეორის სასარგებლოდ მოხსნის კანდიდატურას. „მე მოვხსნი ჩემს კანდიდატურას და საარჩევნო ბიულეტენში არ დავფიქსირდები, რათა ხმები არ გავფანტოთ“, – განაცხადა „ახალგაზრდების პარტიის “თავმჯდომარემ.
სიმიონის პარტია, რომელსაც „რუმინელთა ერთიანობის ალიანსი“ ეწოდება, ექვსი წლის წინ დაარსდა. მან პოპულარობა ხელისუფლების მიერ სიღარიბესთან საბრძოლველად გატარებული ზომების კრიტიკით მოიპოვა. ამასთან, 38 წლის პოლიტიკოსმა რუსეთის მმართველი ვლადიმირ პუტინი სამხედრო დამნაშავედ გამოაცხადა. სიმიონი მხარს უჭერს მეორე მსოფლიო ომამდელი საზღვრების აღდგენას, როდესაც რუმინეთის შემადგენლობაში ბულგარეთის და უკრაინის ტერიტორიების ნაწილი, აგრეთვე მთელი მოლდოვა შედიოდა. როგორც კიევმა, ასევე კიშინიოვმა ის „პერსონა ნონ გრატად“ გამოაცხადეს.
„ჩვენ ევროკავშირის წინააღმდეგი არ ვართ. ჩვენ, რუმინელებს, გვსურს ვიყოთ ევროკავშირის ნაწილი“, – განაცხადა პრეზიდენტობის კანდიდატმა. ბოლო გამოკითხვის თანახმად, ჯორჯე სიმიონს, ისევე როგორც ნებისმიერი სხვა კანდიდატს იმავე პოლიტიკური სპექტრიდან, რომელიც არსებული ხელისუფლების მკაცრ კრიტიკაზე აკეთებს ფსონს, პირველ ტურში ხმების 30 პროცენტის მიღების შანსი აქვს. რუმინელების დიდი ნაწილი მის სახელს კორუფციასთან და მაღალ ინფლაციასთან ბრძოლასთან აკავშირებს.
ცვლილებების მზარდი სურვილი
„რუმინელებს ცვლილება სურდათ და ისევ სურთ“, – ასე ფიქრობს ერთ-ერთი ადგილობრივი ხანდაზმული მოქალაქე. ამომრჩეველთა მნიშვნელოვანი ნაწილი, არჩევნებიდან ჯორჯესკუს მოხსნის გამო, თავს „მოტყუებულად“ გრძნობს. აღარაფერს ვამბობთ სადაზვერვო სამსახურების დასკვნაზე, რომლის თანახმად, „ტიკტოკზე“ მისი მაღალი პოპულარობა მოსკოვის მიერ შექმნილი რვაასი ანგარიშით იყო განპირობებული, რომელებსაც ათასობით ყალბი პროფილი ჯორჯესკუს მხარდასაჭერად იყენებდა.
„როგორ შეიძლება კანდიდატის მოხსნა, როცა ადამიანს ყველაფერი წესრიგში ჰქონდა?“, – გაუგებარია ჯორჯესკოს მხარდამჭერ კორნელია ბორტასთვის.
პოლიტიკური ანალიტიკოსები ვარაუდობენ, რომ არსებული სისტემის მიმართ წინააღმდეგობა, შესაძლოა, გაძლიერდეს. მათი შეფასებით, ჯორჯესკოს მაღალი მხარდაჭერა მხოლოდ იდეოლოგიური ხასიათის არ იყო და, დიდწილად, ხელისუფლების მიმართ საპროტესტო განწყობას გამოხატავდა.
სიმიონიც ამაზე აკეთებს ფსონს და გამოკითხვის თანახმად, მეორე ტურში მოსალოდნელია მისი დაპირისპირება ბუქარესტის ამჟამინდელ მერთან, ნიკუშორ დანთან, რომელიც დამოუკიდებელ კანდიდატად იყრის კენჭს. რუმინეთის პრეზიდენტს საკმაოდ ფართო უფლებამოსილება აქვს – ის ქვეყნის სამომავლო კურსს განსაზღვრავს.