მთელი ღამე გაგრძელდა სამძებრო სამუშაოები პაბრადეს (აღმოსავლეთ ლიეტუვა) სასწავლო პოლიგონის ტერიტორიაზე, საიდანაც 25 მარტს ოთხი ამერიკელი სამხედრო გაუჩინარდა. ჭაობში ჩაძირული იპოვეს მათი მუხლუხიანი მანქანა, რომლის ამოყვანის ოპერაცია გრძელდება.
ლიეტუვას თავდაცვის მინისტრის, დოვილე შაკალიენეს მიერ პარასკევს დილით გაკეთებული განცხადების თანახმად, ღამის განმავლობაში ბრიგადები მუშაობდნენ შლამის გასაწმენდად, რათა მანქანამდე მიეღწიათ, თუმცა, საჭირო გახდა შიდა წყლების მართვის სამმართველოდან (IWD) დიდი მიწისმთხრელი მანქანის მოყვანა, რადგან გაწმენდილი ადგილი კვლავ დაიტბორა.
„წუხელ სხვა ტიპის შლამის შემწოვი მანქანა მუშაობდა. დიდი მიწისმთხრელის მოყვანა დღეისთვის იგეგმება. ღამის განმავლობაში მოცილდა გარკვეული რაოდენობის შლამი, რაც არასაკმარისია, თანაც, ახლომდებარე ტბიდან წყალი კვლავ შემოედინება ამ ტერიტორიაზე”, – განუცხადა მან ლატვიის ეროვნულ რადიომაუწყებელს.
შაკალიენეს თქმით, შლამის ფენა ხუთ მეტრამდე სიღრმისაა. მიუხედავად იმისა, რომ ღამის განმავლობაში ორიდან სამ მეტრამდე გაიწმინდა, მღვრიე წყალი ჩაძირული მანქანის პოვნას კვლავ ხელს უშლის.
მინისტრმა განაცხადა, რომ საჭიროა უფრო გრძელი მილი დაგროვილი წყლის ამოსატუმბად.
„300-მეტრიანი მილი, რომელიც მათ (IWD-ს) აქვთ, საშუალებას მოგვცემს, შლამისა და წყლის ნარევი მასა შემთხვევის ადგილიდან შორს გადავტუმბოთ. ამ საღამოსთვის ბოლოს და ბოლოს გავარღვევთ შლამის უკანასკნელ ბარიერს, რომელიც ჩვენსა და ჩაძირულ მანქანას შორის არსებობს“, – აღნიშნა ლიეტუვას თავდაცვის მინისტრმა.
შაკალიენეს თქმით, ჩაძირული ამერიკული მუხლუხიანი მანქანა მთლიანად უნდა ამოიყვანონ წყლიდან, რათა მისი შემოწმება მაშველებისთვის უსაფრთხო პირობებში მოხდეს.
„წყლიდან ამოღების გარეშე მანქანაში შესვლა მაშველებისთვის მაღალი რისკის შემცველია. ამიტომ, ვგეგმავთ მუხლუხიან მანქანაზე ფოლადის ბაგირების მიბმას, ჭოჭონაქების გამოყენებას და ამ გზით, მის ნაპირზე გამოთრევას“, – განაცხადა მან.
ოთხი ამერიკელი ჯარისკაცი, რომლებიც მუხლუხა სამაშველო მანქანა „M88 Hercules“-ში იმყოფებოდნენ, შვენჩიონისის რაიონში მდებარე პაბრადეს პოლიგონზე მიმდინარე წვრთნების დროს სამშაბათს დაიკარგნენ.
ოთხშაბათს მოხდა მათი გაუჩინარების სავარაუდო ადგილის იდენტიფიცირება და მანქანა დაახლოებით ხუთი მეტრის სიღრმეში აღმოაჩინეს. ჯერ უცნობია, იმყოფებიან თუ არა დაკარგული ჯარისკაცები მანქანის შიგნით.
ლიეტუვას და აშშ-ს სამხედრო პოლიცია, პროკურორების ზედამხედველობით, ჯარისკაცების გაუჩინარების საქმეზე წინასწარ გამოძიებას აწარმოებს.
