კატალონიის უმაღლესმა სასამართლომ მიიჩნია, რომ განაჩენი, რომელიც ცნობილი ეფხბურთელის ოთხი წლითა და ექვსი თვით პატიმრობას ითვალისწინებს, ხარვეზებს შეიცავს და, ამიტომ, ის უნდა გაუქმდეს.
ამასთან, სასამართლოს განმარტებით, მისი გადაწყვეტილება არ ნიშნავს იმას, რომ ფეხბურთელის ვერსია „სრული ჭეშმარიტებაა“.
კატალონიის უმაღლესმა სასამართლომ ერთხმად გააუქმა განაჩენი, რომლითაც ფეხბურთელ დანი ალვეშს, 2022 წლის დეკემბერში, ბარსელონაში არსებულ ღამის კლუბ „სუტონში“ ახალგაზრდა ქალის გაუპატიურებისთვის, ოთხი წლითა და ექვსი თვით პატიმრობა მიესაჯა.
უმაღლესი სასამართლო აცხადებს, რომ გაუქმებულ განაჩენში არის „ხარვეზები, უზუსტობები, შეუსაბამობები და წინააღმდეგობები“ და, აღნიშნულიდან გამომდინარე, მის დასკვნას ვერ გაიზიარებს. გარდა ამისა, სასამართლომ მიიჩნია, რომ არ იყო დაცული „უდანაშაულობის პრეზუმფციის სტანდარტები“, როგორც ამას ალვეშის დაცვის მხარე ამტკიცებდა.
თუმცა, სასამართლო ასევე აღნიშნავს, რომ ბრალდების მხარის ვერსიის დაუდასტურებლობა არ ნიშნავს იმას, თითქოს, ფეხბურთელის მიერ წარმოდგენილი ვერსია „სრული ჭეშმარიტებაა“.
ასეა თუ ისე, კატალონიის უმაღლესი სასამართლოს გადაწყვეტილებით, ალვეში გამართლებულია და მისთვის შეფარდებული სასჯელი გაუქმებულია. სასამართლოს განაჩენში ასევე ნათქვამია, რომ ბრალდების მხარეს არ მოუწევს სასამართლო ხარჯების გადახდა და შეუძლია გადაწყვეტილების უზენაეს სასამართლოში გასაჩივრება.
გარდა ამისა, უმაღლესი სასამართლოს გადაწყვეტილებით, უარყოფილია კერძო ბრალდების საჩივარი, რომელიც სასჯელის 12 წლამდე გაზრდას ითხოვდა, ასევე პროკურატურის საჩივარი, რომელიც განაჩენის ნაწილობრივ გაუქმებასა და სასჯელის 9 წლამდე გაზრდას მოითხოვდა.