რუსული დრონებით განხორციელებული განუწყვეტელი თავდასხმების შემდეგ, ოთხშაბათს, 2 აპრილს, უკრაინის ეროვნულმა პოლიციამ, მოხალისეებთან ერთად, აღმოსავლეთ დონეცკის ოლქში მდებარე ქალაქ პოკროვსკიდან მოსახლეობის ევაკუაცია მოახდინა.
ამ ვიდეოში შესულია ევაკუაციის ამსახველი ის კადრები, როდესაც ხელისუფლება, ორგანიზაცია „თეთრი ანგელოზების“ მოხალისეებთან ერთად, რვა ადამიანს და ერთ ძაღლს გადარჩენაში დაეხმარა. ხელისუფლების წარმომადგენელთა თქმით, ევაკუირებულები ქვეყნის უფრო უსაფრთხო რეგიონებში არიან გადაყვანილნი.
ფრონტის წინა ხაზი პოკროვსკიდან მხოლოდ 2-3 კილომეტრში გადის. საბრძოლო მოქმედებების არეალთან ასეთმა სიახლოვემ ოდესღაც ხალხმრავალი ქალაქი ნანგრევებად აქცია, სადაც ქუჩები ნამსხვრევებითაა მოფენილი და ჰაერში მძიმე შავი კვამლი დგას.
ოფიციალური პირების განცხადებით, ქალაქი თითქმის მუდმივი დაბომბვის ქვეშაა, რის გამოც სულ უფრო იზრდება ადგილობრივების მოთხოვნა უფრო უსაფრთხო რეგიონებში გადაყვანის თაობაზე.
„შენობების ნანგრევებში ადამიანები კვლავ ცხოვრობენ. მოსახლეობის უმეტესობა ტერიტორიას ტოვებს, რადგან ესმის, რომ კიდევ ერთმა დარტყმამ შესაძლოა კედლები მთლიანად ჩამოაქციოს“, – აცხადებს უკრაინის ეროვნული პოლიცია.