ირანის უზენაესმა ლიდერმა, აიათოლა ალი ხამენეიმ ქვეყნის საჯარისო შენაერთები საბრძოლო მზადყოფნაში მოიყვანა. ინფორმაციას Reuters-ი ერთ-ერთ ირანელ მაღალჩინოსანზე დაყრდნობით ავრცელებს.
გარდა ამისა, როგორც ერთ-ერთმა მაღალჩინოსანმა სააგენტოს განუცხადა, ირანმა ერაყი, ქუვეითი, გაერთიანებული არაბთა საამიროები, კატარი, თურქეთი და ბაჰრეინი გააფრთხილა, რომ აშშ-ის ირანზე თავდასხმის ნებისმიერი მხარდაჭერა, კერძოდ ამერიკელი სამხედროების მიერ მათი საჰაერო სივრცის ან ტერიტორიის გამოყენება აღიქმება, როგორც ომში ჩართვა.
ასეთი მხარდაჭერა აღნიშნული ქვეყნებისთვის „სერიოზული შედეგების“ მომტანი იქნება, აღნიშნავს სააგენტო.
როგორც Reuters-ი იუწყება, მიუხედავად იმისა, რომ ირანმა აშშ-ის პრეზიდენტის, დონალდ ტრამპის მოთხოვნა ბირთვული საკითხის ირგვლივ პირდაპირი მოლაპარაკებების შესახებ უარყო, თეირანს ვაშინგტონთან არაპირდაპირი დიალოგის წარმოება სურს.
ასეთი მოლაპარაკებები, როგორც ირანელი მაღალჩინოსანი ამბობს, ირანის პრობლემის პოლიტიკური გადაწყვეტის ვაშინგტონის სურვილის სერიოზულობის შეფასების საშუალებას იძლევა.
ცნობისთვის, მარტის ბოლოს ტრამპი ირანს „მანამდე წარმოუდგენელი დაბომბვით“ დაემუქრა, თუ თეირანი აშშ-თან ბირთვულ შეთანხმებას არ გააფორმებს.