ისრაელის პრემიერ-მინისტრი შეერთებულ შტატებშია. ბენიამინ ნეთანიაჰუს დღეს თეთრ სახლში დონალდ ტრამპი მიიღებს. ორი ქვეყნის ლიდერების მოლაპარაკების მთავარი თემები ღაზის სექტორში მიმდინარე მოვლენები, მძევლების საკითხი და ისრაელის მიმართ შტატების მიერ დაწესებული ტარიფები იქნება. ამის შესახებ თავად პრემიერმა ვაშინგტონში გამგზავრებამდე განაცხადა.
აღსანიშნავია, რომ ბენიამინ ნეთანიაჰუ პირველი ლიდერია, რომელიც სატარიფო პოლიტიკასთან დაკავშირებით, ტრამპს გაესაუბრება.
„მივემგზავრები შეერთებულ შტატებში, რომ პრეზიდენტ ტრამპს შევხდე, რათა განვიხილოთ მძევლების საკითხი და დავასრულოთ ღაზაში გამარჯვების საკითხი. რა თქმა უნდა, ვისაუბრებთ ისრაელის მიმართ დაწესებულ ტარიფებზეც. იმედი მაქვს, შევძლებ ამის მოგვარებას. მე ვარ პირველი საერთაშორისო ლიდერი, რომელიც ტრამპს ისრაელის ეკონომიკისთვის ასეთ მნიშვნელოვან საკითხთან დაკავშირებით ხვდება“, – განაცხადა ნეთანიაჰუმ.