“საინტერესო აქტუალური თემების წამოწევა, შეკითხვების დასმა და ამ შეკითხვებზე პასუხის გასაცემად ხელისუფლების წარმომადგენელთა მოწვევა უფრო ეფექტური იქნება”

ბიუროზე ინიციირებულ პარლამენტის ახალი რეგლამენტის პროექტს პირველი ვიცე-სპიკერი, გიორგი ვოლსკი გამოეხმაურა.

მისვე თქმით, საზოგადოებას სურს უფრო მეტად ანგარიშვალდებული ხელისუფლება.

„საინტერესო, აქტუალური თემების წამოწევა, შეკითხვების დასმა და ამ შეკითხვებზე პასუხის გასაცემად ხელისუფლების წარმომადგენელთა მოწვევა უფრო ეფექტური იქნება, ვიდრე მაგალითად, ამ წლის სექტემბერში გასული წლის ანგარიშის მოსმენა და ასე შემდეგ. ასე, რომ ფორმალიზება ხდება იმ მოსაზრებებისა, რომელიც საზოგადოებაში არსებობს. მათ უნდათ მეტი ანგარიშვალდებული ხელისუფლება“, – განაცხადა ვოლსკიმ.

პარლამენტის ახალი რეგლამენტი ბიუროზეა ინიციირებული. ცვლილების მიხედვით, გაორმაგდება ინტერპელაციების რაოდენობა. დეპუტატებს ყველა სასესიო კვირაში ექნებათ შესაძლებლობა, კითხვით მიმართონ მინისტრებს, პრემიერ-მინისტრს და სხვა ანგარიშვალდებულ პირებს. ასევე, ხდება ინტერპელაციის დროს კითხვაზე პასუხის ეტაპის დასრულების შემდეგ, დებატების წესის ხელახალი მოწესრიგება. შესაბამისად, გაუქმდება „მინისტრის საათის“ ფორმატი. ახალი პროექტის მიხედვით, მუდმივმოქმედ საბჭოებს დროებითი კომისიები ჩაანაცვლებს. იცვლება საკანონმდებლო ინიციატივის წარდგენის წესი. დაინტერესებულ პირს საშუალება ექნება, კომიტეტების ნაცვლად, საკანონმდებლო წინადადება პარლამენტის წევრს წარუდგინოს.