ლატვიის სახელმწიფო საზღვრის დაცვის სამსახურმა სამხრეთ ლატგალიის პროკურატურას გადასცა სისხლის სამართლის საქმე, რომელშიც უკრაინის 25 მოქალაქეც ფიგურირებს. ლატვიის საზოგადოებრივი მაუწყებლის (LSM.lv) ცნობით, ისინი, ორგანიზებულ ჯგუფთან ერთად, ქალაქ ლუძაში არალეგალური სიგარეტის წარმოებაში მონაწილეობდნენ.
გასული წლის 10 დეკემბერს, სახელმწიფო პოლიციამ და სახელმწიფო საზღვრის დაცვის სამსახურმა ლუძასა და რიგაში ერთობლივად ფართომასშტაბიანი ოპერაცია ჩაატარეს, რის შედეგადაც არალეგალური სიგარეტის წარმოების ობიექტი აღმოაჩინეს და 32 პირი დააკავეს.
სისხლის სამართლებრივი დევნა ერთდროულად რამდენიმე ადგილას მიმდინარეობდა. სახელმწიფო პოლიციამ 26 სანქცირებული ჩხრეკა ჩაატარა რიგაში, რომლის დროსაც მზა პროდუქციის საწყობები გამოავლინა და შვიდი პირი, მათ შორის, ლატვიის ექვსი და რუსეთის ერთი მოქალაქე, დააკავა. სახელმწიფო საზღვრის დაცვის სამსახურმა კი რვა ჩხრეკა ჩაატარა ლუძაში, რეზეკნესა და დაუგავპილსში. ლუძას ფაბრიკაში დააპატიმრეს 25 უკრაინელი, რომლებიც „მარლბოროს“, „პრინცის“, „ვინსტონისა“ და „ელ ემ“-ის ბრენდების არალეგალური სიგარეტის წარმოებაში მონაწილეობდნენ.
ყველა დაკავებული დაპატიმრებულია.
24 მარტს ლატვიის სახელმწიფო საზღვრის დაცვის სამსახურმა დაასრულა სისხლის სამართლის საქმის გამოძიება უკრაინის 25 მოქალაქის წინააღმდეგ თამბაქოს ნაწარმის უკანონო წარმოების, შენახვის, გადატანისა და რეალიზების, ასევე სასაქონლო ნიშნის, სხვა განმასხვავებელი ნიშნისა და დიზაინის უკანონო გამოყენების გამო და საქმე სამხრეთ ლატგალიის პროკურატურას გადასცა.
წინასწარ გამოძიებას ორგანიზებული ჯგუფის სხვა წევრების წინააღმდეგ ასევე ლატგალიის რეგიონული პოლიციის სამმართველო აწარმოებს.