აშშ-ის პრეზიდენტის, დონალდ ტრამპის ადმინისტრაციამ გრენლანდიის აღების გეგმის სისრულეში მოყვანა დაიწყო, რომელსაც საფუძვლად კუნძულის არა ძალადობრივი დაპყრობა, არამედ საზოგადოებრივ აზრთან მუშაობა დევს. ინფორმაციას The New York Times-ი ავრცელებს.
როგორც გამოცემას ერთ-ერთმა რესპონდენტმა განუცხადა, გრენლანდიის აღების გეგმა ეროვნული უსაფრთხოების საბჭოს რამდენიმე სხდომაზე განიხილებოდა. რამდენიმე დეპარტამენტს კონკრეტული ინსტრუქციების გატარება უკვე დაევალა.
გეგმის თანახმად, აშშ-მა უნდა შეეცადოს და გადაარწმუნოს კუნძულის 57-ათასიანი მოსახლეობა იმაში, რომ „მათ ამერიკასთან მიერთების შესახებ თხოვნა უნდა წამოაყენონ“.
გარდა ამისა, The New York Times-ის ინფორმაციით, ტრამპი სოციალურ ქსელებში რეკლამის განთავსებას გეგმავს, რომლის მთავარი გზავნილი ის იქნება, რომ ალასკის ძირძველი მოსახლეობა, ინუიტები და გრენლანდიის მაცხოვრებლები მონათესავე ერები არიან.
ტრამპის ადმინისტრაცია აგრეთვე გრენლანდიელებისთვის ფინანსური სტიმულების შესაძლებლობას განიხილავს, მაგალითად, წელიწადში თითოეული მოქალაქისთვის 10 ათასი დოლარის გამოყოფა, მაშინ, როცა დანიის მთავრობა წელიწადში მთლიან კუნძულს მხოლოდ 600 მილიონ დოლარს ურიცხავს.
„ტრამპის ზოგი ჩინოვნიკი ფიქრობს, რომ ამ ფულის კომპენსირება მომავალში გრენლანდიაში მოპოვებული წიაღისეულის, კერძოდ, იშვიათი ლითონების, სპილენძის, ოქროს, ურანისა და ნავთობის საშუალებით შესაძლებელი იქნება“, – აღნიშნავს გამოცემა.