აშშ-ის პრეზიდენტის, დონალდ ტრამპის ადმინისტრაცია 90 დღეში 90 სავაჭრო შეთანხმების დადებას გეგმავს. ინფორმაციას ამის შესახებ „როიტერი“ ავრცელებს.
როგორც მედია წერს, მიუხედავად შეთანხმებებისა, სავაჭრო ომის სწრაფად გადაჭრასთან დაკავშირებული პრობლემები უკვე თვალსაჩინოა.
„როიტერის“ ცნობით, ევროკომისარი ვაჭრობის საკითხებში მაროშ შეფჩოვიჩი, მომდევნო კვირის დასაწყისში ვაშინგტონში ჩავა, რათა ტარიფებთან დაკავშირებული მოლაპარაკებები გამართოს. თუმცა ტარიფების საკითხებში ტრამპის მთავარი მომლაპარაკებელი ფინანსთა მინისტრი სკოტ ბესენტი ამ დროს ბუენოს-აირესში იქნება.
ეჭვები არსებობს სავაჭრო ექსპერტებს შორის იმის შესახებ, თუ რამდენად ეფექტურად შეძლებს ტრამპის ადმინისტრაცია ერთდროულად რამდენიმე მოლაპარაკების მართვას.
თეთრი სახლის სავაჭრო მრჩეველმა, პიტერ ნავარომ Fox Business Network-ის ეთერში განაცხადა, რომ სკოტ ბესენტს, აშშ-ს სავაჭრო წარმომადგენელ ჯემისონ გრირს და ვაჭრობის მინისტრ ჰოვარდ ლუტნიკს შეუძლიათ ამ სამუშაოს შესრულება.
„ჩვენ ვაპირებთ 90 დღეში 90 გარიგების დადებას, ეს შესაძლებელია. პრეზიდენტს შეუძლია მოლაპარაკებების წარმოება. თუ შეთანხმება კარგია, დონალდ ტრამპს შეუძლია განიხილოს მისი მიღების შესაძლებლობა, ხოლო თუ არა, მაშინ მიიღებს ტარიფს“, – აღნიშნა ნავარომ.