საბურთალოს რაიონის გამგეობა სულხან ცინცაძის ქუჩაზე, N46-დან N50-ისა და N79-დან N83-ის ჩათვლით, ექვსი რეკრეაციული სივრცის მოწყობა-რეაბილიტაციას ახორციელებს. ამის შესახებ დღეს თბილისის მუნიციპალიტეტის მთავრობის სხდომაზე დედაქალაქის მერმა, კახა კალაძემ განაცხადა.
მისი თქმით, დედაქალაქში რეკრეაციული სივრცეების შექმნის დიდი პოტენციალი არსებობს, რაც მაქსიმალურად უნდა იყოს გამოყენებული.
„იცით, რამდენად მნიშვნელოვანია მწვანე სივრცეების არსებობა დედაქალაქისთვის. ბევრი კარგი პროექტი განვახორციელეთ ბოლო წლების განმავლობაში, მაგრამ ქალაქს ძალიან დიდი რესურსი აქვს ამ მიმართულებით და გვინდა, ყველა სივრცე, თუნდაც უბნების დონეზე, გამოვიყენოთ მაქსიმალურად ეფექტურად, რათა დასვენებისთვის, ვარჯიშისა და განტვირთვისთვის საუკეთესო სივრცეები შევქმნათ“, – აღნიშნა კახა კალაძემ.
კალაძის თქმით, საერთო ჯამში, სულხან ცინცაძის ქუჩაზე, 7 000 კვ.მ ფართობზე დამონტაჟდება ყველა შესაბამისი საპარკო ინფრასტრუქტურა, მოეწყობა სატრენაჟორო და საბავშვო-გასართობი ზონები, განათებისა და სარწყავი სისტემები, ტერიტორია გამწვანდება, დაიგება რულონური ბალახი და დაირგვება სხვადასხვა სახის ხე-მცენარე.