უცხოურმა ჩარევამ ოპოზიცია ისე აბურდა, რომ თავად ვეღარ ერკვევიან, რა და როგორ გააკეთონ. ხან არჩევნების შედეგები არ მოსწონთ და რევოლუციის მოწყობას ცდილობენ, ეს არ გამოუვიდათ და ახლა არ იციან, რა გადაწყვეტილება მიიღონ, მიიღონ მონაწილეობა არჩევნებში თუ – არა, – ამის შესახებ პარლამენტის თვითმმართველობის კომიტეტის თავმჯდომარემ, ირაკლი ქადაგიშვილმა განაცხადა.
ქადაგიშვილის თქმით, ოპოზიციას საკუთარი მყარი დღის წესრიგი არ აქვს და მთლიანად დამოკიდებული არიან იმ დღის წესრიგზე, რაც უცხოეთიდან საქართველოს წინააღმდეგ იგეგმება.
„აქედან გამომდინარე, საკუთარ თავში ჩამოყალიბებული არ არიან. ვიცით, რომ ზოგი პარტია არჩევნებისთვის ემზადება, ზოგს გადაწყვეტილება არ აქვს მიღებული. საბოლოო ჯამში, რაც უნდა იყოს გარედან ჩარევის სურვილი, საქართველო, როგორც დამოუკიდებელი სახელმწიფო ცხოვრებას გააგრძელებს. ჩვენმა ოპოზიციამ საკუთარი სახე დაკარგა. თვითმმართველობის არჩევნებში თუ მიიღებს მონაწილეობას, მაშინ პარლამენტზე უარი რატომ თქვა? ეს ყველაფერი რთული ასახსნელია, მაგრამ რაც ხდება, მათი დამსახურებაა. ზოგიერთ პარტიას შეიძლება, პრაგმატული გათვლა ჰქონდეს, რომ წაგებას, თქვას, არჩევნებში მონაწილეობას არ მივიღებო. ეს ის განაჩენია, რაც ოპოზიციამ საკუთარ თავს გამოუწერა“, – აღნიშნა ირაკლი ქადაგიშვილმა.