რუსეთის პრეზიდენტის პრესმდივანის, დიმიტრი პესკოვის გაცხადებით, დროებითი ზავის დროს უკრაინისთვის იარაღის მიწოდება უნდა შეწყდეს. ამის შესახებ პესკოვმა „ეიბისი ნიუსთან“ ინტერვიუში ისაუბრა.
„ჩვენ თუ ვსაუბრობთ ცეცხლის შეწყვეტაზე, მაშინ რას ვაპირებთ იმ იარაღის მიწოდებებთან დაკავშირებით, რომლებიც ყოველდღიურად შემოდის აშშ-დან და ევროპული ქვეყნებიდან“, – განაცხადა პესკოვმა.
მისივე თქმით, თუ 30 დღიანი ზავის პირობებში უკრაინისთვის იარაღის მიწოდება გაგრძელდება, ეს კიევს უპირატესობას მისცემს.
„ეს უკრაინისთვის უპირატესობა იქნება. უკრაინა გააგრძელებს სრულ მობილიზაციას, ფრონტზე ახალი საჯარისო ნაწილების გადასროლას. უკრაინა გამოიყენებს ამ პერიოდს ახალი სამხედროების მოსამზადებლად და უკვე მოქმედი სამხედროების დასასვენებლად. მაშინ რატომ უნდა მივცეთ უკრაინას ასეთი უპირატესობა“, – განაცხადა პესკოვმა.
პესკოვმა აღნიშნა, რომ უკრაინის ხელისუფლება არ არის მზად რუსეთთან მოლაპარაკებებისთვის. მისივე თქმით, რუსეთის პრეზიდენტი ვლადიმირ პუტინი ყველაფერს აკეთებს უკრაინის კონფლიქტის დიპლომატიური მეთოდებით მოსაგვარებლად, თუმცა მშვიდობიანი და დიპლომატიური საშუალებების არარსებობის პირობებში, მოსკოვი იძულებულია გააგრძელოს სამხედრო ოპერაცია.
პესკოვის განცხადებით, მოსკოვი იმედოვნებს, რომ აშშ შეძლებს უკრაინის ხელისუფლების დარწმუნებას, რომ კიევმა მეტი მოქნილობა და პოლიტიკური სიბრძნე გამოიჩინოს რუსეთთან კონფლიქტის მოგვარების საკითხში.
„ჩვენ ვიმედოვნებთ, რომ შეერთებული შტატებისა და პრეზიდენტ ტრამპის შუამავლობა დაგვეხმარება კიევის რეჟიმის დარწმუნებაში, გამოიჩინოს ცოტა მეტი მოქნილობა, ცოტა მეტი პოლიტიკური ნება და სიბრძნე“, – აღნიშნა პესკოვმა.