ჰონგ-კონგის დროშის ქვეშ მცურავი კონტეინერმზიდის კაპიტანი, რომელიც ფინეთისა და ესტონეთის დამაკავშირებელი წყალქვეშა მილსადენის დაზიანებაშია ბრალდებული, ჰონგ-კონგში დააკავეს. ამის შესახებ South China Morning Post-ი იუწყება.
ფინეთისა და ესტონეთის უსაფრთხოების სამსახურებმა დაადგინეს, რომ 77 კმ-იანი მილსადენი გემმა 2023 წლის 8 ოქტომბერს , ზღვიდან ღუზის ამოწევის დროს დააზიანა. ჩინეთმა აღიარა, რომ დაზიანება შემთხვევით მოხდა.
43 წლის ვან ვენგუო, ხუთშაბათს, 8 მაისს, სასამართლოს წინაშე სისხლის სამართლის დანაშაულის ბრალდებით და ადგილობრივი საზღვაო კანონების სავარაუდო დარღვევის ორი მუხლით წარსდგა.
პროკურორებმა მოითხოვეს, რომ სასამართლოს ბრალდებული, „ბალტიკკონექტორისთვის“ მიყენებული ზარალისთვის, დამნაშავედ ეცნო.
ვანს ასევე ბრალი ედება ნავიგაციის უსაფრთხოების პროტოკოლების დარღვევაში. კერძოდ, მან ვერ უზრუნველყო გემისთვის საკმარისი რაოდენობის ღუზების ქონა და გემის მფლობელს არ წარუდგინა შესაბამისი ანგარიშები, რითაც დაარღვია სავაჭრო გადაზიდვების უსაფრთხოების შესახებ განკარგულების ორი დებულება.
სასამართლომ შემდეგი მოსმენა ივლისის დასაწყისში დანიშნა, მანამდე კი ვანი პატიმრობაში დარჩება.
მილსადენის დაზიანების შემდეგ, ესტონეთმა და ფინეთმა ჩინეთს განმარტებებისთვის მიმართეს, თუმცა გასული წლის ნოემბრამდე პასუხი არ მიუღიათ. ექსპერტები მიიჩნევდნენ, რომ სამართლიანობის აღდგენის შანსი არ არსებობდა ან თუ არსებობდა – ძალიან მცირე იყო.
„ბალტიკკონექტორის“ დაზიანებული მილსადენის შეკეთება 35 მილიონი ევრო დაჯდა.