თბილისის საკრებულომ გარევაჭრობის აღკვეთის დროს საქონლის კონფისკაციის წესი დაამტკიცა. გარემოვაჭრეებისთვის ჩამორთმეული საქონელი განადგურდება, გადაეცემა სოციალურად დაუცველებს ან გაიყიდება აუქციონზე.
საკითხის განხილვას დეპუტატებს შორის კამათი მოჰყვა.
საკრებულოში „ნაციონალური მოძრაობის“ წევრი სევდია უგრეხელიძე ამ საკითხის გადადებას გარე ვაჭრობის წესის შემუშავებამდე ითხოვდა. თუმცა, ოპოზიციონერი დეპუტატის წინადადება საკრებულოს უმრავლესობამ არ გაითვალისწინა.
„ქართული ოცნების“ წევრის, დავით უთმელიძის განცხადებით, საქართველოში გარე ვაჭრობა კანონით აკრძალულია, გარე მოვაჭრეების გაყვანა კი ზედამხედველობის სამსახურის მიერ კანონის ჩარჩოშია მოქცეული და გარემოვაჭრეების გაფრთხილება 6-10 დღით ადრე ხდება.
თბილისის საკრებულოს თავმჯდომარის მოადგილის გიორგი ტყემალაძის განმარტებით, გარე ვაჭრობის წესზე მუშაობა აქტიურად მიმდინარეობს და დოკუმენტი საკრებულოს უახლოეს სხდომაზე დამტკიცდება.