2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე, სადაც ბიზნესის რეკეტი, მესაკუთრის დაპატიმრება მისი ქონების მისაკუთრების მიზნით და უფლებების უხეში შელახვის სხვა ფაქტები განიხილება, “ნაცმოძრაობის” რეჟიმის მიერ დაზარალებულმა, ბესარიონ ხვინთელიანმა, ციხეში ყოფნის დეტალებზე ისაუბრა.
ბესარიონ ხვინთელიანი კარანტინის საკანში ყოფნას იხსენებს, სადაც 18 კვ.მ ოთახში აუტანელ სიცხეში 40 კაცზე მეტი იმყოფებოდა, საკვებად კი მხოლოდ პური და წყალი ჰქონდათ.
„11 დღე კარანტინში გავატარე. კარანტინის საკანი – 18 კვ.მ 40-ზე მეტი კაცი, შმორის სუნი, ერთმანეთში კამათი, აქედან რომელიმეს გარეთ გაყვანა და ბღავილი. საჭმელი მხოლოდ პური და ონკანის წყალი, გინება, შეუწყვეტელი ცემა-ტყეპა. შემზარავი ხმამაღალი საუბრის ზმუილი და უცებ რკინის კარებზე რაღაც მძიმე საგნის დარტყმა და როგორც ბომბის ხმა სრული სიჩუმე 3-5 წუთი. შემდეგ ეს ყველაფერი ისევ თავიდან. 40 გრადუსიანი სიცხე, წყლით სავსე ბუშტები პატიმრების ტანზე და ხელებზე, ჩამოჯდომა მხოლოდ 7-8 ადამიანს შეეძლო და ამისთვისაც საათობით რიგი იყო. ამგვარ ფაქტებზე სხვებმაც ბევრი ისაუბრეს, საინტერესოა, მხოლოდ ერთი დღე რომ გაატაროს სააკაშვილმა ასეთ პირობებში მიხვდებოდა რამეს?! რა ჩაიდინა და რა გაუკეთა ქართველ ხალხს და საქართველოს“,- განაცხადა ბესარიონ ხვინთელიანმა.
მისივე თქმით, მისი თანდასწრებით ერთ-ერთი პატიმარი სიკვდილამდე სცემეს, რათა სცოდნოდა თუ არ დაემართებოდა იმ შემთხვევაში, თუ არ აღიარებდა დანაშაულს.
„ერთ დღესაც იქ ჩამიყვანეს სადაც ახალ დაჭერილები შემოჰყავდათ, მომათავსეს მეტრ-ნახევრიან ფეხზე დგომით საკანში, სადაც 5 საათამდე ვიდექი. ვნახე შემოიყვანეს 25 წლის მამაკაცი, მედ შემოწმების დროს რაღაც წუნი აუღეს და წრეში მოქცეული 10 -მდე ბადრაგმა მთელი ძალით და ღონით დაუწყეს ცემა. სცემდნენ სანამ საცოდავმა რეაგირება არ შეწყვიტა დარტყმაზე. მე წინასწარ გაფრთხილებული ვიყავი, გისოსებთან უნდა ვმდგარიყავი და მეყურებინა. ფეხზე დგომით გისოსებზე ხელჩაჭიდებული ფეხის დარტყმამ , რამაც თითები დამიზიანა შოკში ჩამაგდო და ციხის ოფიცერმა მიყვირა: უყურე ბიჭო, თუ არ აღიარებ უარესი მოგივაო. ის საცოდავი ხელებით გაათრიეს ოთახიდან სისხლის კვალს ტოვებდა კალიდორში, ბადრაგმა თქვა მგონი ნამეტანი მოგვივიდა მოკვდაო“, – იხსენებს ბესარიონ ხვინთელიანი.