საქართველომ განსაკუთრებული წვლილი შეიტანა ფაშიზმზე გამარჯვებაში, – ამის შესახებ საქართველოს თავდაცვის მინისტრმა ლევან იზორიამ განაცხადა, რომელმაც ვაკის პარკში, უცნობი ჯარისკაცის საფლავი გვირგვინით შეამკო.
“ვულოცავ საქართველოს ომის ვეტერანებს ფაშიზმზე გამარჯვების 72 წლისთავს. საქართველომ ამ გამარჯვებაში განსაკუთრებული წვლილი შეიტანა. ასი ათასობით ქართველი შეეწირა ამ ბრძოლას. ჩვენ ქედს ვიხრით მათი სახელების წინაშე, ვამაყობთ და მომავალი თაობებიც იამაყებს ამ გმირობით”,- განაცხადა იზორიამ.
მან ომის ვეტერანებს ჯანმრთელობა, დიდი ხნის სიცოცხლე და გამთლიანებულ საქართველოში ცხოვრება უსურვა.
ფაშიზმზე გამარჯვებიდან დღეს 72 წელი გავიდა. მეორე მსოფლიო ომს 60 მილიონამდე ადამიანის სიცოცხლე შეეწირა, მათ შორის მხოლოდ საქართველოდან 200 ათასი მოქალაქე დაიღუპა ან უგზო-უკვლოდ დაიკარგა.