მე ყოველთვის ვამბობდი, რომ ვოლოდიმირ ზელენსკის არ აქვს კარტები, მას საქმე აქვს უზარმაზარ, საკმაოდ მამაც არმიასთან, – ამის შესახებ აშშ-ის პრეზიდენტმა, დონალდ ტრამპმა „ფოქს ნიუსთან“ ინტერვიუში განაცხადა.
ამგვარად უპასუხა ტრამპმა ჟურნალისტის კითხვას, მიაჩნია თუ არა, რომ პუტინი არის დაბრკოლება მშვიდობისთვის?
როგორც აშშ-ის პრეზიდენტმა აღნიშნა, მას რთული საუბარი ვოლოდიმირ ზელენსკისთან ჰქონდა.
„მე ძალიან რთული საუბარი მქონდა ზელენსკისთან, რადგან არ მომეწონა, რაც მან თქვა და ეს საქმეს არ ამარტივებს. მე ყოველთვის ვამბობდი, რომ მას არ აქვს კარტები. მას საქმე აქვს უზარმაზარ არმიასთან, მას საქმე აქვს საკმაოდ მამაც არმიასთან, რომელსაც შესანიშნავი შეიარაღება აქვს“, – განაცხადა ტრამპმა.
რაც შეეხება რუსეთის პრეზიდენტ ვლადიმერ პუტინზე ზეწოლასა და მის წინააღმდეგ ბერკეტების გამოყენებას, ტრამპის თქმით, ამას მასზე უკეთ ვერავინ აკეთებს. როგორც აშშ-ის პრეზიდენტმა აღნიშნა, შეთანხმება თუ არ შედგება, ის გამოიყენებს ბერკეტს და ეს გამანადგურებელი იქნება რუსეთისთვის, რადგან მათი ეკონომიკა რთულ მდგომარეობაშია.
ამასთან, დონალდ ტრამპი მიიჩნევს, რომ უკრაინაში ომის დასასრულებლად ვლადიმერ პუტინთან შეთანხმებას შეძლებს. როგორც მან ამავე ინტერვიუში აღნიშნა, სურს, შეხვდეს რუსეთის პრეზიდენტს.