გილოცავთ დღევანდელ დღეს, მთელს საქართველოს ვულოცავ ოჯახის სიწმინდის დღეს, – განუცხადა „ქრონიკას“ საქართველოს იუსტიციის მინისტრმა პაატა სალიამ.
„ძალიან მნიშვნელოვანია მთელმა საქართველომ დაინახოს, რომ საზოგადოება არის ერთიანი იმ ღირებულებებთან დამოკიდებულებაში, რაც ჩვენი სახელმწიფოს მთავარი ბურჯია, ეს არის ძლიერი ოჯახი, ტრადიციული ოჯახი და სწორედ ეს ტრადიციული ოჯახი განაპირობებს ძლიერ სახელმწიფოს.
ჩვენ დაარწმუნებულები ვართ, რომ საქართველო აუცილებლად უახლოეს მომავალში ერთ-ერთი ძლიერი სახელმწიფო იქნება არა მხოლოდ რეგიონში, არამედ მსოფლიოს მასშტაბით. ამის რწმენას გვაძლევს ზუსტად ადამიანების ერთიანობა, რომელსაც დღეს ვხედავთ“, – აღნიშნა პაატა სალიამ.
პაატა სალიამ ასევე უპასუხა კითხვას, „თქვენ იყავით იმ პარლამენტის წევრი, რომელმაც ოჯახურ ღირებულებებსა და არასრულწლოვანების დაცვაზე კანონი მიიღო. ეს ერთგვარი პასუხია დღეს? უპრეცედენტო ერთობა საზოგადოების თუნდაც ამ კანონის მოწინააღმდეგეებისთვის?“
„რა თქმა უნდა. თქვენ ხედავთ ადამიანების რაოდენობას, თქვენ ხედავთ ადამიანების სულისკვეთებას და მათ განწყობას.
ჩვენ როდესაც გვესმის, რომ რამდენიმე ათეული ადამიანი ახერხებს რუსთაველის გადაკეტვას საღამოს საათებში ხელოვნურად და ამას წარმოაჩენენ თითქოს ეს არის ქართველი ერის ხმა და ქართველი ხალხის ხმა, აი აქ არის დღეს ქართველი ერის ხმა, ქართველი ხალხის ხმა. სწორედ ეს არის ნამდვილი საქართველო.
ისინიც, რა თქმა უნდა, ჩვენი მოქალაქეები არიან, თუმცა კიდევ ერთხელ მინდა ხაზი გავუსვა, ჩემი აზრით და ჩვენი გუნდის აზრით, ეს ადამიანები არიან გარკვეული პროპაგანდის მსხვერპლი და იმედი გვაქვს, რომ ისინიც მოუბრუნდებიან ჭეშმარიტ სარწმუნოებას, მოუბრუნდებიან იმ ჭეშმარიტ საფუძვლებს, ღირებულებებს, რაც არის ჩვენი სახელმწიფოსთვის ძალიან მნიშვნელოვანი და სახელმწიფოს ბურჯი, ასე ვთქვათ. ამიტომ, დღევანდელი დღე კიდევ ერთხელ ხაზს უსვამს იმას, რომ ოჯახი, ტრადიციები არის უმნიშვნელოვანესი იმისათვის, რომ ჩვენ ნამდვილად ძლიერი სახელმწიფო გვქონდეს. ვისაც ძლიერი სახელმწიფო სურს, ის უნდა იყოს ჩვენს გვერდით და მხარი დაუჭიროს ტრადიციებს, ოჯახის სიძლიერეს“, – აღნიშნა პაატა სალიამ.