საქართველოში ოჯახის სიწმინდისა და მშობლების პატივისცემის დღესთან დაკავშირებით, სამებაში მსვლელობის დასრულების შემდეგ, საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა, შიომ (მუჯირი) შეკრებილებს კიდევ ერთი ქადაგებით მიმართა.
მისი თქმით, ოჯახის წინააღმდეგ ბოროტი ძალების მიერ სხვადასხვა მავნე ტექნოლოგიის, თეორიის მეშვეობით მიზანმიმართული ბრძოლა მიმდინარეობს.
„დიდი სიხარულია, რომ ჩვენ ყველანი ერთად – ეკლესიაც, ხალხიც ასეთი შემართებით, ერთსულოვნებით აღვნიშნავთ ოჯახის სიწმინდის დღეს. ეს ნიშნავს, რომ ვაცნობიერებთ ჩვენ, თუ რა საშიშროება ემუქრება ოჯახს და რამდენად მოსაფრთხილებელი და გადასარჩენია იგი. მიზანმიმართული ბრძოლა მიდის ოჯახის წინააღმდეგ ბოროტი ძალების მიერ სხვადასხვა მავნე ტექნოლოგიების, თეორიების მეშვეობით.
ეს ძალები ებრძვიან არა მარტო ეკლესიასა და ეკლესიურ ოჯახებს, არამედ ზოგადად, ტრადიციულ ოჯახს. მინდა ასევე ვთქვა, რომ ისინი სახელმწიფოსაც ებრძვიან, სახელმწიფოს სუვერენიტეტის მცნებასაც ებრძვიან“, – განაცხადა მეუფე შიომ.