პარლამენტში დროებითი საგამოძიებო კომისიის სხდომაზე ტელეკომპანია „იმედის“ მფლობელს, ირაკლი რუხაძეს უსმენენ. მან ისაუბრა ტელეკომპანია „მაესტროს“ შექმნაზე, რომელმაც დიდი წვლილი შეიტანა სააკაშვილის რეჟიმის დამხობაში.
„მაესტრო” იყო მუსიკალური ტელევიზია, რომელსაც არ აძლევდნენ საშუალებას, რომ პოლიტიკური გადაცემები გაეკეთებინა. მამუკა ღლონტის იყო, რომელიც ამაში იყო ძალიან აქტიურად პოზიტიურად ჩართული. სააკაშვილი ამასობაში დადიოდა, CNN-ზე გამოვიდა და მახსოვს თქვა, რომ 27 დამოუკიდებელი ოპოზიციური ტელევიზიაა საქართველოში, რაღაც სიგიჟეებს ჰყვებოდა, აბსოლუტურად ტყუილებს.
საქართველოში ჩამოსული იყო სოლანა, რომელიც იყო NATO-ს ყოფილი მდივანი და მერე იყო, თუ არ ვცდები ევროპული კომისიის თავმჯდომარე. სოლანა შეხვდა ოპოზიციას, სადაც ძმებმა [გაჩეჩილაძეებმა] დაიწუწუნეს, რომ ტელევიზიები დახურესო. და ასეთი რაღაც თქვა, რომ რას ლაპარაკობთო, სააკაშვილი მიყვება, რომ ასეთი თავისუფალი მედია გარემო გაქვთო და უმარტივესია თქვენთვის ლიცენზიის აღებაო. მაშინ უთხრეს, წადი და გაგვაკეთებინე ლიცენზიაო და გააკეთებინა. ეს კაცი წავიდა უკან და მისცეს „მაესტროს“ ლიცენზია, იმიტომ, რომ ჩარეული იყო ევროკომისიის თავმჯდომარე. მხოლოდ საკაბელო მაუწყებლობის ლიცენზია მისცეს და სააკაშვილი იყო დარწმუნებული, რომ მერე გამოართვევინებდა საკაბელოებს და ასეც მოხდა. როგორც კი „მაესტრომ“ დაიწყო პოლიტიკური გადაცემების, ახალი ამბების და საერთოდ მერე, „საკანი” გააკეთა, რაღაც მომენტში დაიწყეს გამორთვა. რუსთავმა გამორთო, ახმეტამ და რეგიონებმა დაიწყეს გამორთვა. ყველა დიდმა საკაბელომ თბილისშიც გათიშა „მაესტრო”. ეს იყო გეგმა, რომ ლიცენზია კი მისცეს, მაგრამ მერე გათიშავდნენ საკაბელოებიდან და ახლა საკაბელოშიც თუ არ ხარ, იყავი და ილაპარაკე რამდენიც გინდა მიკროფონში. გაჩნდა ერთი საკაბელო, დარწმუნებული ვარ, რომ ეს იყო „აიეტი”, თუმცა ასე ზეპირად არ მახსოვს, რომელმაც ამაზე უარი თქვა. „აიეტს“ თანამფლობელობა ჰქონდა ამერიკული და ამიტომ ეს ძალიან დაეხმარათ მათ, თორემ წარმოუდგენელი სტრესის ქვეშ მოხვდა. ეს „აიეტი”, რომ არ ყოფილიყო ჩვენ შეიძლება აქ არ ვმსხდარიყავით ახლა. „აიეტი” ვერ გატეხეს და გადიოდა ერთი პატარა არხი, სადაც გადიოდა „საკანი” და თუ გახსოვთ თქვენ, ამის საყურებლად ხალხი იკრიბებოდა იმ ოჯახებში, სადაც „აიეტი” ედგათ მაშინ. ესეც კი პატარა არხი, ერთი გადაცემით, სულ პატარა ბიუჯეტიანი, ამან დიდ ამბავში გამოიწვია რაღაც. მერე ამას რა თქმა უნდა დაემატა „მეცხრე არხი“ ბატონი ბიძინასი, მაგრამ „მაესტრო” იყო ის, რომელმაც ციხის კადრები გაუშვა და მერე ბევრი რაღაც, რაც მოხდა. ამიტომ ძალიან კარგად ესმოდა სააკაშვილს, თუ რამდენად მნიშვნელოვანი იყო, რომ არ ყოფილიყო არაფერი ეგეთი“, – აღნიშნა ირაკლი რუხაძემ.