ვულოცავ მთელს საქართველოს დამოუკიდებლობის დღეს, 26 მაისს. ეს არის დღე, რომელიც გვაერთიანებს ყველას, – განუცხადა „ქრონიკას“ საქართველოს თავდაცვის მინისტრმა ირაკლი ჩიქოვანმა.
„ეს არის დღე, რომელიც არის სიმბოლო ჩვენი სამშობლოს, ჩვენი სახელმწიფოს თავისუფლებისთვის ბრძოლის სიმბოლო. ეს არის ჩვენი სუვერენიტეტისთვის ბრძოლის სიმბოლო და ეს არის ჩვენი ერთიანი სახელმწიფოს სიმბოლო. მინდა ყველას მივულოცო დღევანდელი დღე.
აუცილებლად დღევანდელ დღეს მინდა გავიხსენო ჩვენი ეროვნული გმირი, მერაბ კოსტავა, რომლის დაბადების დღეც დღეს არის“, – აღნიშნა ირაკლი ჩიქოვანმა.
მისი თქმით, დღევანდელ ღონისძიებაში რამდენიმე ათასი სამხედრო მიიღებს მონაწილეობას.
„ტრადიციულად, 26 მაისს ჩვენ აღვნიშნავთ ფიცის დადების ცერემონიალით, სადაც მონაწილეობს საქართველოს თავდაცვის ძალების აბსოლუტურად ყველა სახეობა. რეკრუტებისთვის ეს არის უმნიშვნელოვანესი დღე. რამდენიმე ათასი სამხედრო მიიღებს მონაწილეობას დღეს ამ ღონისძიებაში. ასევე გამოფენილია ტექნიკა, ის შეიარაღება, რომელიც თავდაცვის ძალების შემადგენლობაში გვაქვს. ეს არის ძალიან ლამაზი დღე, კარგი დღე. ამის გარდა, მინდა ვთქვა, რომ დღეს მართლაც ყველას ამაღლებული განწყობა აქვს, ყველას საზეიმო განწყობა აქვს და გეტყვით იმასაც, რომ უკვე ჩვენმა რამდენიმე ოფიცერმა, რამდენიმე სამხედრომ ხელიც სთხოვა და ოჯახებიც იქმნება დღევანდელ დღეს“, – განაცხადა ირაკლი ჩიქოვანმა.
მისივე თქმით, საქართველო საკუთარი დამოუკიდებლობის აღდგენის დღიდან ყოველდღიურად ცდილობდა დაახლოებოდა საკუთარ ისტორიულ ადგილს, ეს არის ევროპული ოჯახი.
„ჩვენ დარწმუნებულები ვართ, რომ იმ გეგმებით, რომელიც ჩვენ გვაქვს, აუცილებლად შევძლებთ დავიმკვიდროთ ჩვენი ადგილი ევროპულ ოჯახში და რა თქმა უნდა, ეს მოხდება ერთიანი სახელმწიფოს პირობებში. დარწმუნებული ვარ, უკეთესი ერთიანი მომავლის თანაშემოქმედნი იქნებიან ჩვენი აფხაზი და ოსი დები და ძმები. ეს აუცილებლად ასე იქნება მიუხედავად იმისა, ისტორიის განმავლობაში რომ ხდებოდა, როდესაც საქართველო არ იყო ერთიანი და მთლიანი, საქართველო ყოველთვის მთლიანდებოდა. დარწმუნებული ვარ, ჩვენ ამას შევძლებთ ერთად, მშვიდობით, ერთმანეთის მხარდაჭერით და გავაგრძელებთ იმ დიდ ტრადიციას, იმ ურთიერთობების დიდ ტრადიციას, რომელსაც ქმნიდნენ მრავალი საუკუნეების განმავლობაში სხვადასხვა თაობები“, – აღნიშნა ირაკლი ჩიქოვანმა.