თავდაცვის მინისტრის ირაკლი ჩიქოვანის დამოუკიდებლობის დღისადმი მიძღვნილ ღონისძიებაზე სიტყვით გამოვიდა. მინისტრის სიტყვას უცვლელად გთავაზობთ.
„ბატონო პრეზიდენტო, ბატონო პრემიერ-მინისტრო, ბატონო პარლამენტის თავმჯდომარევ, საპატრიარქო ტახტის მოსაყდრევ მეუფე შიო, პატივცემულო მთავრობისა და პარლამენტის წევრებო, პატივცემულო სტუმრებო,
ბატონო თავდაცვის ძალების მეთაურო, ბატონო გენერლებო, ოფიცრებო, სერჟანტებო, კაპრალებო და რიგითებო,
გილოცავთ საქართველოს დამოუკიდებლობის დღეს – 26 მაისს!
დღევანდელი დღე განსაკუთრებული და საამაყოა ყველა ჩვენგანისთვის, რადგან ეს დიდი ეროვნული დღესასწაული საქართველოს თავისუფლების, დამოუკიდებლობისა და სუვერენიტეტის სიმბოლოა. მხოლოდ მტკიცე და გაუტეხელ ერს შესწევს უნარი და ძალა საუკუნეებით გამოატაროს თავისუფლების იდეა, შეინარჩუნოს ეროვნული იდენტობა, ღირებულებები და ამავე დროს გახდეს თანამედროვე მსოფლიოს ცივილიზაციის მონაპოვართა თანაზიარი.
სწორედ ამიტომ, ეს დღე ეკუთვნის საქართველოს ყველა მოქალაქეს, ჩვენი მრავალ ეთნიკურ და მრავალკონფესიურ საზოგადოების თითოეულ წარმომადგენელს.
ეს დღე ეკუთვნის ჩვენს საამაყო სამხედროებს, პოლიციელებს, უსაფრთხოების სამსახურის თანამშრომლებს, მეხანძრე-მაშველებს, ექიმებს, მასწავლებლებს, დიპლომატებს, საჯარო მოხელეებს,ფერმერებს, მეწარმეებს, ყველას, ვინც ემსახურება საქართველოს და ზრუნავს მის მომავალზე. მინდა დღევანდელი დღე განსაკუთრებით მივულოცო ჩვენს სამხედროებს – ოფიცრებს, სერჟანტებს, კაპრალებს და რიგითებს, ვინც ღირსეულად და ამაყად ატარებთ ქართველი ჯარისკაცის სახელს.
ქართული ჯარი დამოუკიდებლობისა და თავისუფლების დაცვის მთავარი ფუნდამენტი, ღირსების და სამშობლოსადმი ერთგულების უდიდესი სიმბოლოა. სამშობლოს სამსახური კი, ყველაზე დიდი პატივია. მინდა მივულოცო დამოუკიდებლობის დღე ჩვენს საამაყო, დაუმარცხებელ დაჭრილ-დაშავებულ მებრძოლებს; მათთან ერთად, ჩვენს ვეტერანებს, რომლებმაც შექმნეს თავდაცვის ძალების მტკიცე საფუძველი.
დღეს გამორჩეული დღეა რეკრუტებისთვის, მათ ფიცი 26 მაისს დადეს! მათ ღვთისა და ქვეყნის წინაშე შეჰფიცეს, რომ პირნათლად მოიხდიან მხედრულ ვალს საქართველოს წინაშე და საკუთარი სიცოცხლის უკანასკნელ წუთამდე იბრძოლებენ სამშობლოსათვის. მჯერა, ისინი არასოდეს დაივიწყებთ, რის ფასად მოიპოვა ჩვენმა ქვეყანამ დამოუკიდებლობა, არასოდეს დაივიწყებენ მათ, ვინც სიცოცხლე შესწირა საქართველოს თავისუფლებას.
მინდა ქედი მოვიხარო ჩვენი დაღუპული გმირი მეომრების წინაშე, რომელთაც ჩვენი ქვეყნის მომავლისთვის საკუთარი სიცოცხლე დათმეს. სწორედ ჩვენი გმირების ხსოვნა გვავალდებულებს, რომ საქართველოს მრავალსაუკუნოვანი ბრძოლა თავისუფალი, სუვერენული, ძლიერი და ერთიანი სახელმწიფოს შექმნით უნდა დასრულდეს. დარწმუნებული ვარ, ჩვენი აფხაზი და ოსი ძმები და დები, ჩვენი საერთო მომავლის თანაშემოქმედნი იქნებიან. ჩვენ აუცილებლად გავაგრძელებთ იმ ისტორიას, რომელსაც ურთიერთპატივისცემით საუკუნეების განმავლობაში მრავალი თაობა ქმნიდა.
წარმატებული სახელმწიფოს მშენებლობა მხოლოდ მოტივირებულ და გავლენებისაგან თავისუფალი საზოგადოების ძალისხმევით არის შესაძლებელი. საუკუნეებმა გვასწავლა, რომ გონიერება და სიმტკიცე, ერთობა და ურთიერთგატანა ქართველი ერის საუკეთესო იარაღია.
მინდა დიდი პატივისცემით აღვნიშნო ჩვენი ეკლესიის როლი დამოუკიდებელი და თავისუფალი საქართველოს მოპოვებაში, ჩვენი იდენტობისა და ეროვნული თვითმყოფადობის განმტკიცებაში.
რა თქმა უნდა, ასევე უმნიშვნელოვანესია და დასაფასებელია კონფესიების როლი, რომლებთან სამაგალითო თანაცხოვრებითა და ურთიერთპატივისცემით ისტორიულად ვქმნიდით და დღესაც ვაშენებთ თანამედროვე ქართულ სახელმწიფოს.
26 მაისი შეგვახსენებს, რომ ჩვენ გვაქვს უდიდესი პასუხისმგებლობა, რომელიც ჩვენი სამშობლოს მომავლის წინაშე გვაკისრია, რათა არა მარტო შევინარჩუნოთ ჩვენი ქვეყნის დამოუკიდებლობა და სახელმწიფოებრიობა, არამედ სრულყოფილად გავიაზროთ სუვერენიტეტის იდეა, რომლის გარეშეც ძნელი იქნება ჭეშმარიტად თავისუფალი, დემოკრატიული, ერთიანი და წარმატებული სახელმწიფოს მშენებლობა.
დარწმუნებული ვარ, ხელისუფლების და ჩვენი ლიდერების ძალისხმევით შედეგად, საქართველო თავისი ისტორიული ფესვებიდან აღმოცენებული მრავალსაუკონოვანი უნიკალური კულტურითა და იდენტობით, ღირსეულ ადგილს დაიმკვიდრებს საერთო ევროპულ ოჯახში და ამ ოჯახში, იქნება სუვერენული და თანასწორუფლებიანი სახელმწიფო, როგორც კულტურული და ისტორიული, ასევე, პოლიტიკური თვალსაზრისით. კიდევ ერთხელ სრულიად საქართველოს ვულოცავ დამოუკიდებლობის დღეს! ღმერთი იყოს ჩვენი მფარველი! მადლობა!“ – განაცხადა მინისტრმა.