იუსტიციის სამინისტრო საქართველოს დამოუკიდებლობის დღეს მოქალაქეებს გორში მასპინძლობს.
გორის ცენტრალურ მოედანზე მთელი დღის განმავლობაში გაიმართება კულტურული, სპორტული, საბავშვო და გასართობი აქტივობები, თეატრალური წარმოდგენები, მასტერკლასები, შემეცნებითი ქვიზები.
სტუმრებს საშუალება ექნებათ, დაათვალიერონ საქართველოს პირველი რესპუბლიკისა და დამოუკიდებლობის აღდგენის დღისადმი მიძღვნილი გამოფენა; მოეწყობა მსჯავრდებულთა ხელნაკეთი ნივთების გამოფენა-გაყიდვაც.
მთელი დღის განმავლობაში იმუშავებს საკონსულტაციო სივრცეები, სადაც მოქალაქეებს საშუალება ექნებათ, საჭირო ინფორმაცია მიიღონ იუსტიციის სახლის, სახელმწიფო სერვისების განვითარების სააგენტოს, საჯარო რეესტრის ეროვნული სააგენტოსა და ნოტარიუსთა პალატის წარმომადგენლებისგან.
დღის ბოლოს გაიმართება გალა კონცერტი ადგილობრივი და მოწვეული შემსრულებლების მონაწილეობით.