უცხოური აგენტების რეგისტრაციის შესახებ კანონი ძალაში შევიდა. ამერიკული ფარას ზუსტი ასლის აღსრულებაზე პასუხისმგებელია ანტიკორუფციული ბიურო. უწყების საერთაშორისო ურთიერთობის დეპარტამენტის უფროსმა გიორგი ბაღდავაძემ „ქრონიკას“ განუმარტა, რა შემთხვევაში მოუწევთ მედიასაშუალებებსა და არასამთავრობო ორგანიზაციებს რეგისტრაცია.
„მედიას შესაძლოა, მხოლოდ იმ შემთხვევაში წარმოეშვას რეგისტრაცია, თუ რამდენიმე კუმულაციური პირობა იქნება სახეზე. ეს არის: თუ დაფინანსების 20%-ზე მეტი მოდის უცხოური პრინციპალისგან და ასევე, როდესაც სახეზე გვაქვს უცხოური პრინციპალის მიერ დაკვეთილი პოლიტიკური აქტიურობა. სხვა შემთხვევაში მედიას, რა თქმა უნდა, არ წარმოეშვება არანაირი რეგისტრაციის ვალდებულება.
რაც შეეხება არასამთავრობო ორგანიზაციებს, არასწორია მოსაზრება, რომლის მიხედვითაც, თითქოსდა, ყველა არასამთავრობო ორგანიზაციას უწევს რეგისტრაცია. ეს ასე არ არის. მხოლოდ იმ არასამთავრობო ორგანიზაციებს, რომლებიც გარკვეულწილად პოლიტიკური აქტივობებით არიან დაკავებულები, შეიძლება შეეხოს რეგისტრაცია.
არსებობს 2 სახის სანქციები – სისხლისსამართლებრივი (და ეს კარგად არის გაწერილი კანონში), არის ასევე სამოქალაქო სამართლებრივი მიმართულებით პროცესები. შესაძლოა, ეს იყოს რეგისტრაციის დავალდებულება სასამართლოს მეშვეობით. შეიძლება, სასამართლომ გამოიყენოს სხვა მექანიზმები, როგორებიც არის საქმიანობის აკრძალვა და ა.შ. ეს უკვე სასამართლოს განსახილველი იქნება“, – განაცხადა ბაღდავაძემ.