გლდანის რაიონის გამგეობა სანდრო ახმეტელის ქუჩის სრულ რეაბილიტაციას ახორციელებს. ამის შესახებ ინფორმაციას თბილისის მერიის პრესსამსახური ავრცელებს. მათივე ცნობით, სამუშაოები რამდენიმე ეტაპად ჩატარდება.
როგორც მერიაში აცხადებენ, ამ დროისთვის, კომპანია „ჯორჯიან უოთერ ენდ ფაუერი“ ქუჩაზე წყალარინების ქსელს ცვლის, რაიონის გამგეობა კი ინფრასტრუქტურულ სამუშაოებს ახორციელებს.
ახმეტელის ქუჩაზე მიმდინარე სამუშაოებს დედაქალაქის მერი კახა კალაძე, მერის მოადგილე ირაკლი ბენდელიანთან ერთად გაეცნო.
„გლდანის რაიონის გამგეობა მნიშვნელოვან ინფრასტრუქტურულ სამუშაოებს ახორციელებს. მიმდინარეობს სანდრო ახმეტელის, ყოფილი აკაკი ვასაძის ქუჩის სრული რეაბილიტაცია-განახლება. პირველ რიგში, წესრიგდება მიწისქვეშა კომუნიკაციები, რაც საფრთხეს უქმნიდა ადგილობრივ მოსახლეობას – საცხოვრებელი კორპუსების დიდი ნაწილისსარდაფებში წყალი შედიოდა. გარდა ამისა, ჩატარდება გამწვანების სამუშაოები, განახლდება სკვერები და მოწესრიგდება შუა გამყოფი ზოლი. სამუშაოების დასრულებას ვგეგმავთ აგვისტოს ბოლოსთვის, როდესაც საგზაო ინფრასტრუქტურა სრულად იქნება მოწესრიგებული. გარკვეული დისკომფორტი არსებობს გადაადგილების თვალსაზრისით, თუმცა ამის გარეშე ტერიტორიის მოწესრიგება ვერ ხერხდება“, – განაცხადა კახა კალაძემ.
თბილისის მერიის ცნობით, საგზაო სამუშაოები 15 000 კვ.მ ფართობზე ჩატარდება, რომლის ფარგლებშიც, ელექტროსადენები განთავსდება მიწისქვეშა კაბელ-არხებში, შეიცვლება გარე განათების ქსელი და დამონტაჟდება ენერგოეფექტური სანათები. ასევე, გამოიყოფა საზოგადოებრივი ტრანსპორტის ზოლი, დაიხაზება ზებრა გადასასვლელები და მოეწყობა საპარკინგე სივრცეები.
„პროექტის ფარგლებში, მერიის გარემოს დაცვის საქალაქო სამსახურის მიერ, ტერიტორიაზე ჩატარდება გამწვანების სამუშაოები. კერძოდ, განხორციელდება ტერიტორიაზე არსებული შუა ზოლისა და სამი სკვერის რეაბილიტაცია.
ქუჩის გამყოფ ზოლსა და მიმდებარე თარგებში მოეწყობა სარწყავი სისტემა, დაითესება ბალახი და დაირგვება სხვადასხვა სახეობის მწვანე ნარგავი. სკვერების ტერიტორიაზე, მოეწყობა საბავშვო და სპორტული მოედნები, საფეხმავლო ბილიკები, გარე განათების სისტემა და ერთ ჰექტარ ტერიტორიაზე ჩატარდება გამწვანების სამუშაოები.
გზის რეაბილიტაციისთვის გამგეობის ბიუჯეტიდან 2 600 000 ლარია გამოყოფილი, ხოლო გამწვანების მიმართულებით სამი მლნ ლარი დაიხარჯება.
მიმდინარე სამუშაოებს, თბილისის მერთან ერთად, გლდანის გამგებელი ბესიკ კალაძე და რაიონის მაჟორიტარი დეპუტატი კონსტანტინე ზარნაძე გაეცნენ“,- აღნიშნულია თბილისის მერიის ინფორმაციაში.