ოპოზიცია საკუთარ მომხრეებთან ერთად თავის გზაზე ანადგურებს ყველაფერს, – განუცხადა ჟურნალისტებს საპარლამენტო პოლიტიკური ჯგუფის, „ხალხის ძალის“ თავმჯდომარემ დიმიტრი ხუნდაძემ, რითაც გამოეხმაურა „ერთიანი ნეიტრალური საქართველოს“ მოწოდებას ხელისუფლებისადმი, რომ სასამართლო პროცესებზე წესრიგი უზრუნველყოს.
დიმიტრი ხუნდაძის თქმით, რადიკალები არიან მაოხრებელი გზირები.
„ოპოზიცია საკუთარ მომხრეებთან ერთად თავის გზაზე ანადგურებს ყველაფერს. ის ებრძვის პიროვნებას, ებრძვის სახელმწიფო ინსტიტუტებს. მათ სურთ, რომ სიძულვილის ენა, მათი ეს უსახური საქციელი გამოიყენონ მტრობის სტიმულირებისთვის და ვფიქრობ, საჭიროა მისი აღკვეთა. ისინი არიან მაოხრებელი გზირები, ამიტომ მათ ქვეყანა არ უნდა ავაოხრებინოთ. საკანონმდებლო ბაზა უნდა იყოს იმდაგვარი, რომ ეს შესაძლებელი გახდეს“, – აღნიშნა დიმიტრი ხუნდაძემ.
„ერთიანი ნეიტრალური საქართველო“ ხელისუფლებას მიმართავს უზრუნველყოს წესრიგი სასამართლო პროცესებზე. საზოგადოებრივი მოძრაობის წევრები აცხადებენ, რომ რადიკალური ჯგუფების დესტრუქციულმა ქმედებებმა და ძალადობამ, ქუჩიდან სასამართლო დარბაზებში გადაინაცვლა. ორგანიზაციის წევრების თქმით, კოლექტიური „ნაცმოძრაობის“ აქტივისტები არ ერიდებიან მოსამართლეების, პროკურორების, მანდატურებისა თუ სხვა სახელმწიფო მოხელეების შეურაცხყოფას და მათზე ფიზიკურ თავდასხმასაც.