“აზერბაიჯანის ტერიტორია არ შეიძლება და არ იქნება გამოყენებული არცერთი ქვეყნის მიერ მესამე მხარის წინააღმდეგ”

აზერბაიჯანისა და ირანის საგარეო საქმეთა მინისტრებს შორის სატელეფონო საუბარი გაიმართა.

აზერბაიჯანის საგარეო საქმეთა მინისტრმა, ჯეიჰუნ ბაირამოვმა და ირანის საგარეო საქმეთა მინისტრმა, აბას არაღჩიმ ისრაელსა და ირანს შორის არსებული ვითარება განიხილეს.

როგორც აზერბაიჯანის საგარეო საქმეთა სამინისტროს განცხადებაშია აღნიშნული, ირანის საგარეო საქმეთა მინისტრმა ჯეიჰუნ ბაირამოვს დეტალური ინფორმაცია მიაწოდა ისრაელის სახელმწიფოს მიერ განხორციელებული თავდასხმისა და ამ თავდასხმის საპასუხოდ ირანის მიერ მიღებული მოქმედებების შესახებ.

განცხადების თანახმად, აზერბაიჯანის საგარეო საქმეთა მინისტრმა შეშფოთება გამოხატა რეგიონში მზარდი დაძაბულობის გამო.

ბაირამოვმა აღნიშნა, რომ ყველაზე შემაშფოთებელია ბირთვული ობიექტების ირგვლივ არსებული ვითარება. მისივე თქმით, არსებული საკითხები უნდა მოგვარდეს დიალოგისა და დიპლომატიის გზით, საერთაშორისო სამართალთან, ნორმებსა და პრინციპებთან შესაბამისობით.

საგარეო უწყების განცხადების თანახმად, აზერბაიჯანის საგარეო საქმეთა მინისტრმა მტკიცედ განაცხადა, რომ აზერბაიჯანის ტერიტორია არ შეიძლება და არ იქნება გამოყენებული არცერთი ქვეყნის მიერ მესამე მხარის წინააღმდეგ, მათ შორის მეზობელი და მეგობარი ირანის.

ირანის საჰაერო სივრცის დახურვის გათვალისწინებით, ბაირამოვმა აღნიშნა, რომ აზერბაიჯანმა უზრუნველყო სხვადასხვა ქვეყნების წარმომადგენლებისა და ირანისთვის გადასასვლელი გზა თავისი სახმელეთო საზღვრების მეშვეობით.