აზერბაიჯანისა და ირანის საგარეო საქმეთა მინისტრებმა სატელეფონო საუბრის დროს ისრაელსა და ირანს შორის არსებული ვითარება განიხილეს. ინფორმაციას აზერბაიჯანის საგარეო საქმეთა სამინისტრო ავრცელებს. მათივე ცნობით, ირანის საგარეო საქმეთა მინისტრმა აბას არაღჩიმ ჯეიჰუნ ბაირამოვს დეტალური ინფორმაცია მიაწოდა ისრაელის სახელმწიფოს მიერ განხორციელებული თავდასხმისა და ამ თავდასხმის საპასუხოდ ირანის მოქმედებების შესახებ.
აზერბაიჯანის საგარეო საქმეთა მინისტრმა შეშფოთება გამოხატა რეგიონში მზარდი დაძაბულობის გამო. მისივე თქმით, არსებული საკითხები უნდა მოგვარდეს დიალოგისა და დიპლომატიის გზით, საერთაშორისო სამართალთან, ნორმებსა და პრინციპებთან შესაბამისობით.
აზერბაიჯანის საგარეო საქმეთა მინისტრმა მტკიცედ განაცხადა, რომ აზერბაიჯანის ტერიტორია არ იქნება გამოყენებული არცერთი ქვეყნის მიერ მესამე მხარის წინააღმდეგ, მათ შორის მეზობელი და მეგობარი ირანის.
ამასთან, ირანის საჰაერო სივრცის დახურვის გათვალისწინებით, ბაირამოვმა აღნიშნა, რომ აზერბაიჯანმა უზრუნველყო სხვადასხვა ქვეყნის წარმომადგენლებისა და ირანისთვის გადასასვლელი გზა თავისი სახმელეთო საზღვრების მეშვეობით.