ჩინეთის საგარეო საქმეთა მინისტრმა ვანგ იმ ირანელ კოლეგა სეიედ აბას არაღჩისთან სატელეფონო საუბარი გამართა. ინფორმაციას საუბრის დეტალებზე ჩინეთის საგარეო საქმეთა სამინისტრო ავრცელებს.
„არაღჩიმ ის რეგიონში არსებული ვითარების შესახებ მიაწოდა ინფორმაცია და აღნიშნა, რომ ისრაელის თავდასხმას ირანზე მსხვერპლი მოჰყვა, როგორც სამხედრო პერსონალში, ასევე მშვიდობიან მოქალაქეებში. მისივე თქმით, ისრაელის სამხედრო ოპერაცია ძალიან სახიფათოა და შეიძლება მთელი რეგიონი სრულმასშტაბიან ომში ჩაითრიოს. მინისტრმა იმედი გამოთქვა, რომ საერთაშორისო თანამეგობრობა ერთხმად მოუწოდებს ისრაელს სამხედრო ოპერაციების შეწყვეტისკენ. არაღჩიმ ჩინეთს ირანის პოზიციებისა და მხარდაჭერისთვის მადლობა გადაუხადა და აღნიშნა, რომ დარწმუნებულია – ჩინეთი უფრო მნიშვნელოვან როლს შეასრულებს რეგიონული მშვიდობისა და სტაბილურობის დამყარებაში.
თავის მხრივ, ვანგ იმ განაცხადა, რომ ჩინეთმა საჯაროდ დააფიქსირა თავისი პოზიცია ისრაელის ირანზე თავდასხმის შემდეგ. ჩინეთი კატეგორიულად გმობს ისრაელის მიერ ირანის სუვერენიტეტის, უსაფრთხოების და ტერიტორიული მთლიანობის დარღვევას და მტკიცედ ეწინააღმდეგება უპასუხისმგებლო თავდასხმებს, რომლებიც მიზანში იღებს ირანის ოფიციალურ პირებს და იწვევს მსხვერპლს მშვიდობიან მოსახლეობაში. ჩინეთი მხარს უჭერს ირანს მისი ეროვნული სუვერენიტეტის დაცვაში, კანონიერ უფლებებსა და ინტერესების დაცვაში და საკუთარი ხალხის უსაფრთხოების უზრუნველყოფაში. ისრაელის ქმედებები სერიოზულად არღვევს გაეროს ქარტიის მიზნებსა და პრინციპებს და საერთაშორისო ურთიერთობების ძირეულ ნორმებს. კერძოდ, ისრაელის თავდასხმებმა ირანის ბირთვულ ობიექტებზე შექმნა სახიფათო პრეცედენტი, რომელსაც შესაძლოა კატასტროფული შედეგები მოჰყვეს.
ჩინეთი მხარს უჭერს საერთაშორისო საზოგადოებას სამართლიანობის დაცვაში და თავისი პოზიციის რაც შეიძლება, სწრაფად დაფიქსირებაში. ასევე, ჩინეთი მოუწოდებს იმ ქვეყნებს, რომლებსაც აქვთ გავლენა ისრაელზე, გადადგან კონკრეტული ნაბიჯები მშვიდობის აღსადგენად.
ვან იმ ასევე განაცხადა, რომ ამ მომენტისთვის ვითარება რეგიონში კრიტიკულია. ჩინეთი მზად არის ირანთან და სხვა მხარეებთან კომუნიკაციის შენარჩუნებაში და სიტუაციის დეესკალაციაში კონსტრუქციული როლის შესრულებისთვის“, – აღნიშნულია უწყების მიერ გავრცელებულ ინფორმაციაში.
ისრაელმა და ირანმა ერთმანეთის ტერიტორიაზე დარტყმების განხორციელება 13 ივნისს დაიწყეს. ისრაელელმა სამხედროებმა ირანზე თავდასხმა ქვეყნის ბირთვული პროგრამის განადგურებით მიზნით დაიწყეს, რის შემდეგაც ირანმა საპასუხო დარტყმების განხორციელება დაიწყო.