დონალდ ტრამპმა „დიდი შვიდეულის“ სამიტი ნაადრევად იმის გამო დატოვა, რომ არ მოსწონს მაკრონი და არ სურდა ზელენსკისთან შეხვედრა, – ამის შესახებ „ფაინენშალ თაიმსი“ წერს.
გამოცემის ცნობით, ნატო-ს წლევანდელი სამიტის ორდღიანი სამუშაო სესია ერთ დღემდე მხოლოდ იმ მიზნით შეამცირეს, რომ თავიდან აირიდონ აშშ-ის პრეზიდენტის მიერ სამიტის ნაადრევად დატოვების შესაძლებლობა, როგორც ეს რამდენიმე დღის წინ კანადაში, „დიდი შვიდეულის“ სამიტის შემთხვევაში მოხდა. მაშინ დონალდ ტრამპმა განაცხადა, რომ თეთრ სახლში ნაადრევად დაბრუნება ისრაელსა და ირანს შორის კონფლიქტის მოსაგვარებლად სჭირდებოდა.
თუმცა, როგორც გამოცემა წერს, საქმის კურსში მყოფი პირები „ირწმუნებიან, რომ აშშ-ის პრეზიდენტის გადაწყვეტილება წასვლის თაობაზე ნაწილობრივ გამოწვეული იყო საფრანგეთის პრეზიდენტით, ემანუელ მაკრონით გაღიზიანებით, რომელიც კანადაში ჩასვლამდე გრენლანდიას ეწვია და გააკრტიკა ტრამპის გეგმები, კონტროლი მოიპოვოს კუნძულზე, და რომ აშშ-ის პრეზიდენტს არ გააჩნია უკრაინის ლიდერთან შეხვედრის ინტერესი“.