თბილისში ელექტროენერგიის მიწოდება აბონენტების უმრავლესობას უკვე აღუდგა. კომპანია „თელასის“ ინფორმაციით, ელექროენერგია 16:11 საათზე 160 000 აბონენტს გაეთიშა. შეზღუდვის გამო მეტროს საბურთალოს ხაზის მუშაობაც შეფერხდა.
„16:11 საათზე ჩვენს 10 მაღალი ძაბვის ქვესადგურს შეუწყდა ელექტროენერგიის მიწოდება. შუქის გარეშე დარჩა 160 000-მდე მომხმარებელი, თუმცა ამ დროისთვის უკვე, აბონენტების უმრავლესობას აღუდგა ელექტროენერგიის მიწოდება. გათიშვა „თელასისგან“ დამოუკიდებელი მიზეზებით მოხდა“, – ნათქვამია „თელასის“ განცხადებაში.
”საქართველოს სახელმწიფო ელექტროსისტემის” ინფორმაციით, ელექტროენერგიის შეზღუდვა სომხეთთან დამაკავშირებელი ელექტროგადამცემი ხაზის, ”ალავერდის” გამორთვამ გამოიწვია.
კომპანიის ცნობით, პრობლემა აღმოფხვრილია და ელექტროენერგიის მიწოდება სრულად აღდგენილია. შეზღუდვა მთელი საქართველოს მასშტაბით რეგიონების ნაწილსა და თბილისის გარკვეულ უბნებს შეეხო.
”გამოირთო სომხეთთან დამაკავშირებელი ელექტროგადამცემი ხაზი „ალავერდი“, რამაც გამოიწვია მომხმარებლისთვის ელექტროენერგიის შეზღუდვა. საქართველოს უმეტეს რეგიონში ელექტროენერგიის მიწოდება შეზღუდული იყო, ასევე, თბილისის ნაწილში. ზუსტი რაოდენობა ამ დროისთვის დგინდება. პრობლემა აღმოფხვრილია და ელექტროენერგიის მიწოდება ყველგან აღდგენილია. მიზეზები ამ დროისთვის უცნობია”, – აცხადებენ ”ელექტროსისტემაში”.