მინდა, კახი კალაძეს განსაკუთრებული მადლობა გადავუხადო იმ შთამბეჭდავი შედეგებისთვის, რომლებიც აქვს დედაქალაქის ხელმძღვანელობას, – ამის შესახებ საქართველოს პრემიერ-მინისტრმა ირაკლი კობახიძემ ჯანდაცვისა და სოციალური პოლიტიკის შესახებ თბილისის მერის ანგარიშის მოსმენის შემდეგ განაცხადა.
მთავრობის მეთაურმა აღნიშნა, რომ ეს განვითარება შემდეგი 4 წლის განმავლობაშიც უნდა გაგრძელდეს.
„დღეს კიდევ ერთხელ დავრწმუნდით, თუ რა მასშტაბის ღონისძიებები განხორციელდა გასული 4 წლის განმავლობაში დედაქალაქის მერიის მიერ კახი კალაძის ხელმძღვანელობით. დღეს მოვისმინეთ პრეზენტაცია ჯანდაცვასა და სოციალურ საკითხებთან დაკავშირებით და ამ მიმართულებითაც ძალიან შთამბეჭდავია შედეგები. ნახეთ, რამდენ ადამიანს ემსახურება, რამდენ ადამიანზე ზრუნავს დედაქალაქის მერია. ასიათასობით თბილისელი სარგებლობს ყოველწლიურად უამრავი მომსახურებით, იქნება ეს ჯანდაცვის თუ სოციალურ სფეროში. ასევე ნახეთ, როგორია შედეგები საბავშვო ბაღების მიმართულებით. ყველა მიმართულებით დედაქალაქის მერია არის ძალიან წარმატებული. დარწმუნებული ვარ, მომდევნო ოთხი წლის განმავლობაში დედაქალაქს ექნება კიდევ ძალიან ბევრი მიღწევა კახი კალაძის ხელმძღვანელობით“, – განაცხადა ირაკლი კობახიძემ.
თბილისის ჯანდაცვისა და სოციალური პოლიტიკის შესახებ დედაქალაქის მერის ანგარიშს პრემიერ-მინისტრი მთავრობის წევრებთან ერთად დაესწრო. ღონისძიებაზე კახა კალაძემ იმ პროგრამებზე ისაუბრა, რომლებსაც მერია ჯანდაცვისა და სოციალური კუთხით, უსახლკაროთა საცხოვრისით უზრუნველყოფის, საცხოვრებელი ფართების დაკანონების, კოოპერატიული ბინათმშენებლობებისა და საბავშვო ბაგა-ბაღების მხარდაჭერის მიმართულებებით ახორციელებს. მერის ინფორმაციით, 2018-2025 წლებში ამ სფეროში მერიამ 540 მილიონ ლარზე მეტი დახარჯა.
