პოლკოვნიკ ბესიკ ქუთათელაძის სახელობის საჩხერის სამთო მომზადების სკოლა სამი კვირის განმავლობაში ამერიკელი და ქართველი სამხედრო მოსამსახურეებისთვის განკუთვნილ „სამთო მომზადების ზაფხულის საბაზისო კურსს“ მასპინძლობდა.
ინფორმაციას ამის შესახებ საქართველოს თავდაცვის სამინისტროს პრესსამსახური ავრცელებს.
მათივე ცნობით, სწავლებაში მონაწილეობდნენ აშშ-ის ჯორჯიის შტატის ეროვნული გვარდიისა და აშშ-ის ვესტ-პოინტის სამხედრო აკადემიის და საქართველოს სპეციალური ოპერაციების სარდლობის სამხედრო მოსამსახურეები.
„კურსის გამოშვების ცერემონიალს დაესწრნენ თავდაცვის მინისტრის მოადგილე გრიგოლ გიორგაძე, თავდაცვის ძალების მეთაურის მოადგილე, გენერალ-მაიორი ზაზა ჩხაიძე, წვრთნებისა და სამხედრო განათლების სარდალი, პოლკოვნიკი ზურაბ ხვიჩია, სპეციალური ოპერაციების სარდალი, პოლკოვნიკი თეიმურაზ ყლატეიშვილი და თავდაცვის თანამშრომლობის ოფისის ოფიცერი, მაიორი ალეკ ჰარისონი.
კურსი, რომელიც საქართველოსა და ამერიკის შეერთებულ შტატებს შორის თავდაცვის სფეროში ორმხრივი თანამშრომლობის ფარგლებში მიმდინარეობდა, საჩხერისა და ჭიათურის სასწავლო უბნებზე ჩატარდა. სწავლების ძირითადი დრო სამხედრო მოსამსახურეების სამთო ტექნიკურ მომზადებას დაეთმო. სწავლების მონაწილეებმა სკოლის ინსტრუქტორების დახმარებით კლდეზე ცოცვის, დაბრკოლებათა ზოლის გადალახვის, ფიქსირებულ თოკზე ასვლა-დაშვების, მდინარის ფორსირების, მთიან რელიეფზე უსაფრთხოების დაცვით წესების გადაადგილების, დაშავებულისთვის პირველადი დახმარების აღმოჩენის, კოლექტიური გადარჩენისა და ევაკუაციისთვის საჭირო ტექნიკა შეისწავლეს. კურსის დასრულების შემდეგ მსმენელებს სერტიფიკატები და სამკერდე ნიშნები გადაეცათ“, – აღნიშნულია თავდაცვის სამინისტროს პრესსამსახურის მიერ გავრცელებულ ინფორმაციაში.