ნუ დავივიწყებთ იმას, რომ პოლიტიკა გაცილებით უფრო ღრმა და მრავალფეროვანია, ვიდრე ეს პროპაგანდისტულ ბანერებზე წერია ხოლმე. სწორედ აქ არის ის რეალობა, რომელსაც საქართველო და ეს ხელისუფლება 2012 წლიდან სხვადასხვა ინტენსივობითა და ძალით აწყდებოდა ევროკავშირთან დაახლოების გზაზე, – განაცხადა რეგიონული პოლიტიკისა და თვითმმართველობის კომიტეტის თავმჯდომარემ ირაკლი ქადაგიშვილმა „დღის ქრონიკაში“.
მან აღნიშნა, რომ ოპოზიცია ხშირად საკუთარ პარტიულ ინტერესებს ქვეყნის ინტერესებზე მაღლა აყენებდა და მაგალითად ვიზალიბერალიზაციის პროცესი მოიყვანა.
„მათ, თავიანთი ვიწროპარტიული დღის წესრიგის მიხედვით, უნდოდათ რომ დაზიანებულიყო ქვეყნის საქმე, იმიტომ რომ თვლიდნენ – ეს საქმე თუ გამოვიდოდა „ქართული ოცნების“ ხელისუფლების პირობებში, მაშინ მათი, როგორც ოპოზიციური პარტიის შანსი, მცირდებოდა. აი ეს ეგოისტური მიდგომა ჰქონდათ. ბუნებრივია, იყო მეორე ინტერესი, რომელიც უკვე უცხოეთიდან მომდინარეობდა და უცხოეთი ასეთი ტიპის მეხუთე კოლონას აქტიურად იყენებს და თავისი მფარველობის ქვეშ აჰყავს“, – მიიჩნევს ქადაგიშვილი.
მისივე თქმით, ყველა კრიტერიუმის მიხედვით, საქართველო მთელი რიგი მიმართულებებით უკვე ევროკავშირის წევრ სახელმწიფოებსაც უტოლდებოდა და უსწრებდა, მაგრამ პოლიტიკური გადაწყვეტილებები ყოველთვის წინააღმდეგობრივი იყო.
„რეალური პოლიტიკა მოითხოვდა საქართველოსგან ისეთი ნაბიჯების გადადგმას, რომელიც ჩვენი ქვეყნისთვის ცალსახად დამაზიანებელი იქნებოდა. ნურავინ წარმოიდგენს, რომ ევროკავშირთან დაახლოება საკუთარი ინტერესების გვერდზე გადადებას ნიშნავს. არსებობს ისეთი ეროვნული ინტერესები, რომელთა უგულებელყოფა არ შეიძლება. გამჭვირვალობა ერთ-ერთი პირველი შემაფერხებელი საკითხი აღმოჩნდა. იმ ფონზე, როდესაც საქართველო თავისი ბიუჯეტის გამჭვირვალოებით მსოფლიო ლიდერია, აღმოჩნდა, რომ არასამთავრობო სექტორი, რომლის მოღვაწეობის ძირითადი ნაწილი სწორედ გამჭვირვალობის იდეის დამკვიდრებას უნდა დათმობოდა, თვითონ გამჭვირვალობის კატეგოიულად წინააღმდეგი აღმოჩნდა. მათი სპონსორებიც, ანუ დონორებიც ამის წინააღმდეგები აღმოჩნდნენ. რატომ? იმიტომ რომ სამწუხაროდ, არასამთავრობო კლასტერი, რომელიც პოლიტიკურ პარტიებთან და მედიასთან არის გადადაჭვული, რომელსაც ქვეყნის შიგნით ხალხისგან არანაირი ლეგიტიმაცია არ გააჩნია, გამოიყენეს ქვეყანაში პოლიტიკურ პროცესებში ჩარევისთვის“, – განაცხადა ქადაგიშვილმა.