ორშაბათს, 30 ივნისს, შუადღისას, კაუნასის მერი, ვისვალდას მატიოშაიტისი, საკუთარი მანქანით, ფეხით მოსიარულეთა გადასასვლელზე მამაკაცს შეეჯახა.
საზარალებული პირის საავადმყოფოში გადაყვანის ფაქტი, სააგენტო „ბალტიკ ნიუს სერვისთან“ (BNS) საუბარში, კაუნასის საოლქო პოლიციის პრეს-სპიკერმა, ოდეტა ვაიტკევიჩიენემ დაადასტურა.
„12:04 საათზე გამვლელისგან მივიღეთ შეტყობინება, რომ „როლს როისი“, რომელსაც წინასწარი მონაცემებით, ქალაქის მერი მართავდა, პრამონეს გამზირზე, ფეხით მოსიარულეთა გადასასვლელზე, 30 წლის ფეხით მოსიარულეს დაეჯახა“, – განაცხადა მან.
მიღებული დაზიანებების გამო, ფეხით მოსიარულე სამედიცინო დაწესებულებაში გადაიყვანეს.
„არსებული ინფორმაციით, ფეხით მოსიარულის სიცოცხლეს საფრთხე არ ემუქრება. ასევე დადგინდა, რომ ავტომობილის მართვისას, მერი ფხიზელ მდგომარეობაში იმყოფებოდა“, – განაცხადა ვაიტკევიჩიენემ.
კითხვაზე, დაიწყო თუ არა პოლიციამ ინციდენტის გამოძიება, პრეს-სპიკერმა აღნიშნა: „შემთხვევის ადგილზე პოლიციის თანამშრომლები მუშაობას აგრძელებენ. საგზაო შემთხვევის ოქმის შედგენას კიდევ ცოტა დრო დასჭირდება“.
მატიოშაიტისმა თავისი ავტომობილი ფეხით მოსიარულეს 2018 წლის ზამთარშიც დააჯახა და დააზიანა.
მაშინ, მერის მანქანა, კაუნასის ცენტრში, წმ. გერტრუდას ქუჩაზე, გადასასვლელთან, 80 წლის მამაკაცს შეეჯახა. ქვეითისთვის მიღებული დაზიანებები სერიოზული არ აღმოჩნდა.
იმ ავტოსაგზაო შემთხვევის დროს, მატიოშაიტისმა პირობა დადო, რომ სამუშაო საათებში მანქანის საჭეს აღარ მიუჯდებოდა.
მერის სახელი ასევე ფიგურირებს კიდევ უფრო ადრე, 2016 წელს მომხდარ ინციდენტში, როდესაც მატიოშაიტისმა, სავარაუდოდ, გზა არ დაუთმო ქვეითს, რომელიც ქუჩის გადაკვეთას აპირებდა. ამ ავტოსაგზაო შემთხვევის მოწმემ მაშინ განაცხადა, რომ დაინახა კაცი, რომელიც გადასასვლელზე შავ მანქანას მიყრდნობოდა და მძღოლზე გაბრაზებული, მუშტებს კაპოტს ურტყამდა.