ქალთა და ბავშვთა საკითხებზე მომუშავე პარლამენტის დროებითი კომისიის სხდომაზე, კომისიის წევრმა, პოლიტიკური ჯგუფის „ხალხის ძალის“ თავმჯდომარემ დიმიტრი ხუნდაძემ ქვეყანაში არსებულ დემოგრაფიულ ვითარებასთან დაკავშირებით პრეზენტაცია გამართა.
მომხსენებელმა შობადობის და დაბერების კუთხით არსებულ ვითარებაზე ისაუბრა. მან ყურადღება გაამახვილა როგორც შიდა, ასევე გარე მიგრაციის პროცესებზე.
„ამ პროცესში გამოიკვეთა, რომ სასარგებლო იქნება ჯანმრთელობის დაცვისა და სოციალურ საკითხთა კომიტეტის ჩართვა. კომიტეტის და კომისიის ერთობლივი სხდომა გაიმართება და საბოლოო რეკომენდაციები ჩამოყალიბდება. ჩვენ მიერ შემუშავებული რეკომენდაციები მთავრობას წარედგინება. ასევე გამოითქვა სურვილი, რომ კომისიის თითოეული წევრი დაესწროს დემოგრაფიული საბჭოს სხდომას, რომელსაც პრემიერ-მინისტრი გამართავს“, – განაცხადა დიმიტრი ხუნდაძემ.
როგორც ქალთა და ბავშვთა საკითხებზე მომუშავე საქართველოს პარლამენტის დროებითი კომისიის თავმჯდომარემ მარიამ ლაშხმა განმარტა, სხდომაზე დაისახა სამოქმედო გეგმა, რომელიც ერთი მხრივ, ითვალისწინებს არსებული პროგრამების შეფასებას და ანალიზს, მეორე მხრივ კი მუშაობს ახალ ინიციატივებზე.
„კომისიის შექმნიდან თვენახევარია გასული და საკმაოდ აქტიურად და ინტენსიურად მიმდინარეობს მუშაობა. ერთ-ერთი მნიშვნელოვანი პრიორიტეტი არის დემოგრაფიული მდგომარეობა – ჩვენი ქვეყნის, რეგიონის თუ მსოფლიო გამოწვევების ფონზე. ჯანმრთელობის დაცვისა და სოციალურ საკითხთა კომიტეტთან ერთად, კოორდინირებულად, რეკომენდაციების აღსრულების გეგმას შევიმუშავებთ. ჩვენ ასევე ვახდენთ შემუშავებული რეკომენდაციების ანალიზს და ვმუშაობთ კონკრეტულ ინიციატივებზე“, – განაცხადა მარიამ ლაშხმა.
ინფორმაციას პარლამენტის პრესსამსახური ავრცელებს.